لاہور (آن لائن) نیب لاہور نے شراب لائسنس کے اجراء کے کیس کے بعد وزیراعلیٰ پنجاب سردار عثمان بزدار کے خلاف تحقیقات کا ایک نیا کھاتہ کھول لیا ہے، نئے کھاتے کا تعلق ٹھوکر نیاز بیگ پر زیر تعمیر داخلی گیٹ وے بتایا گیا ہے، ذرائع کے مطابق نیب لاہور نے مذکورہ منصوبے کے حوالے
سے ٹھوس شواہد اکٹھے کرتے ہوئے محکمہ ایل ڈی اے اور ٹیپا سے زیر تعمیر گیٹ وے سے متعلق تمام ریکارڈ طلب کر لیا ہے، بتایا گیا ہے کہ ٹھوکر نیاز بیگ گیٹ وے منصوبے کی مجموعی مالیت اڑھائی کروڑ روپے تھی جو بنتے ہی بنتے 8 کروڑ روپے تک پہنچ گئی جبکہ نیب نے اس بات کی تحقیقات کرنے کا فیصلہ کیا ہے کہ اڑھائی کروڑ روپے مالیت کا منصوبہ 8 کروڑ روپے تک کیسے پہنچ گیا، ذرائع کے مطابق نہ صرف شراب لائسنس کا اجراء اور ٹھوکر نیاز بیگ گیٹ وے منصوبہ بلکہ وزیراعلیٰ پنجاب نے مبینہ طور پر اپنے من پسند ٹھیکیداروں کو نوازنے کے لئے مختلف تعمیراتی ٹھیکے بھی دے رکھے ہیں، یہ بھی بتایا گیا ہے کہ نیب لاہور نے وزیراعلیٰ پنجاب کے خلاف مذکورہ منصوبے کے حوالے سے باقاعدہ تحقیقات کا آغاز کر دیا ہے، نیب نے تحقیقات کا آغاز بعض ذرائع سے ملنے والی شکایات کی روشنی میں شروع کیا ہے اور اس سلسلے میں ایل ڈی اے اور ٹیپا سے متعلقہ منصوبے سے متعلق ریکارڈ طلب کر لیا ہے۔
