حیدر آباد دکن(این این آئی) بھارت میں کھانسی کی مدد سے کورونا مرض کی نشاندہی کرنیوالی ایپ تیار کرلی گئی۔میڈیا رپورٹ کے مطابق بھارت کے شہر حیدرآباد دکن میں کورونا وائرس ٹیسٹ میں مدد کی غرض سے کھانسی کی اسکریننگ کیلئے ایک ’KAS کاس‘ نامی ایپ تیار کی گئی ہے جس سے سانس کی حالت معلوم کی جاسکتی ہے۔
اس ایپ میں صارف اپنی کھانسی کی آواز ریکارڈ کرے گا جس سے ایپ تجزیہ کرکے نتائج بتائے گی۔اس ایپ کا اصل مقصد مختصر مدت میں مریضوں کی بڑی تعداد کے لیے ابتدائی اسکریننگ کا عمل ممکن بنانا ہے۔بھارتی میڈیا کے مطابق اس ایپ کا نام ’کاس‘ اس لیے رکھا گیا ہے کہ کیونکہ سنسکرت زبان میں کاس کے معنی کھانسی کے ہیں۔مذکورہ ایپ حیدرآباد دکن میں قائم اسٹارٹ اپ سالسیٹ ٹیکنالوجیز اور آئی ٹی فرم زینسارک ٹیکنالوجیز پرائیویٹ لمیٹڈ نے تیار کی ہے۔زینسارک کے عہدیدار منموہن جین نے بتایا کہ یہ ایپ سانس کی مختلف بیماریوں کے تحت مختلف اصولوں پر کام کرتی ہے یعنی جن افراد کو سانس کی بیماری ہوتی ہے انہیں کھانسی کی شکایت ہوتی ہے، ایسی صورت میں یہ ایپ بتائے گی کہ کونسی کھانسی کی آواز کس بیماری کی نشاندہی کر رہی ہے۔اس ایپ کو تیار کرنے والوں کا کہنا ہے کہ اسے لیبارٹری کے متبادل نہ سمجھا جائے اور اسے صرف ایک مانٹیرنگ آلے کے طور پر جانچا جائے۔
