واشنگٹن (این این آئی)امریکی ائیر فورس کے نئے قواعد کے تحت مسلمان اہلکاروں کو داڑھی اور حجاب کی اجازت مل گئی ہے۔امریکی میڈیا کے مطابق ائیر فورس نے لباس کے قواعد و ضوابط میں تبدیلیاں کی ہیں جس کے تحت مسلمان اور سکھ اہلکار اپنے مذہبی احکامات پر عمل کرتے ہوئے ڈیوٹی کرسکیں گے۔نئی اصلاحات کے بعد امریکی ائیر فورس میں شامل مسلمان داڑھی رکھ سکیں گے
جبکہ مسلم خواتین یونیفارم کے ساتھ حجاب کرسکیں گی۔قواعد کے مطابق سکھ اہلکار بھی داڑھی رکھنے کے ساتھ ساتھ اپنے مذہبی عقائد کے مطابق پگڑی بھی پہن سکیں گے۔نئے قواعد و ضوابط کے مطابق داڑھی صاف ستھری اور زیادہ سے زیادہ ٹھوڑی سے 2 انچ نیچے ہوسکتی ہے۔پگڑی اور حجاب کے رنگوں کو مدھم یا فوجی وردی کے رنگ سے ہم آہنگ ہونے کی شرط لازم رکھی گئی ہے تاکہ ائیر فورس کا پیشہ ورانہ انداز بھی متاثر نہ ہو۔اس سے قبل امریکی ائیرفورس میں داڑھی رکھنے یا پگڑی پہننے کے لیے انفرادی بنیادوں پر اجازت لینا پڑتی تھی۔2018 میں امریکی ائیرفورس میں پہلی بار کسی فوجی کو داڑھی رکھنے کی اجازت دی گئی تھی جو کہ ایک مسلمان اہلکار سارجنٹ عبدالرحمان کو ملی تھی جب کہ 2019 میں ایک سکھ اہلکار کو بھی داڑھی اور پگڑی کی اجازت دی گئی تھی۔کیپٹن میسا اوزا امریکی ائیرفورس میں حجاب پہننے والی پہلی مسلم خاتون تھیں انہیں 2018 میں یہ اجازت دی گئی تھی۔
