لاہور(نیوز ڈیسک) پاکستان اور سری لنکا سیریز زور کے جوڑ کے ساتھ ساتھ آئی سی سی ٹیسٹ رینکنگ میں تیسری پوزیشن کی جنگ بھی ہے ، پاکستان اور سری لنکا کے درمیان ٹیسٹ سیریز میں سخت مقابلے متوقع ہیں۔ دونوں ٹیمیں جہاں جیت کیلئے زور آزما ہیں وہیں آئی سی سی ٹیسٹ رینکنگ میں تیسری پوزیشن پر قبضہ جمانے کی جنگ بھی لڑنا ہو گی۔ موجودہ صورت حال کے مطابق قومی ٹیم ٹیسٹ رینکنگ میں چھٹے جبکہ سری لنکا ساتویں نمبر پر ہے۔ پاک سری لنکا ٹیسٹ سیریز میں فتح جس کے حصے میں آئے گی وہی ٹیم تیسری پوزیشن پر قبضہ جمائے گی۔ قومی شاہین اگر ٹیسٹ سیریز 0-3 یا 1-2 سے اپنے نام کرتے ہیں تو پاکستان رینکنگ ٹیبل پر چھٹے سے تیسرے نمبر پر آجائے گا۔ اس کے برعکس اگر میزبان سری لنکا ٹیسٹ سیریز میں 0-3 یا 1-2 سے فتح سمیٹتی ہے تو سری لنکا ساتویں سے تیسرے نمبر پر پہنچ جائے گی جبکہ پاکستان ایک درجہ تنزلی کے ساتھ ساتویں نمبر پر براجمان ہو گی۔ اب دیکھنا یہ ہے کہ پاک سری لنکا ٹیسٹ سیریز میں جیت اور تیسری پوزیشن کس کے حصے میں آتی ہے۔