نئی دہلی(آئی این پی)بھارت میں انتہا پسند جماعت بی جے پی کے مرکزی رہنما رویندر رائنا نے کہا ہے کہ اصل میں کشمیر کے کچھ حصہ پر پاکستان کا غیر قانونی قبضہ ہے، آزاد کشمیر جموں کشمیر کا اٹوٹ انگ ہے، جلد ہی بھارت اپنے علاقے کو دوبارہ حاصل کر لے گا۔
آزاد کشمیر اراکین اسمبلی کے نئی دلی کو میمورنڈم پیش کرنے پر میں نے مکمل مدد اور تعاون کا یقین دلایا ہے، پاکستان عالمی منظر نامے پر تنہا ہے اسلئے اسے خطے سے اپنا سازوسامان سمیٹنا ہوگا ورنہ ایسا نہ ہو کہ اسے بھارت کے غیظ و غضب کا سامنا کرنا پڑے۔ بین الاقوامی خبر رساں ادارے کے مطابق بھارت کی حکمران جماعت بی جے پی کے مرکزی رہنما رویندر رائنا نے کہا کہ پاکستان کے زیر انتظام آزاد کشمیر بھی جموں و کشمیر کا حصہ ہے جو پاکستان کے غیر قانونی قبضے میں ہے۔انہوں نے میڈیا سے بات کرتے ہوئے کہا کہ وہ دن دور نہیں جب بھارت کا اپنے علاقے پر مکمل قبضہ ہوگا۔ جس کے لئے بھارتی حکومت کافی سنجیدہ ہے۔ پاکستان کے زیر انتظام آزاد کشمیر اسمبلی کے بہت سے اراکین پارلیمنٹ نئی دہلی میں ان سے آزاد کشمیر کے لوگوں کی طرف سے ملتے ہیں۔ہمیں ان لوگوں کی طرف سے میمورنڈم پیش کرتے ہیں اور میں نے ان کو مکمل مدد اور تعاون کا یقین دلایا ہے۔انہوں نے کہا کہ پاکستان عالمی منظر نامے پر تنہا رہ گیا ہے اس لئے اسے خطے سے اپنا سازوسامان سمیٹنا ہوگا ورنہ ایسا نہ ہو کہ اسے بھارت کے غیظ و غضب کا سامنا کرنا پڑے۔ رویندر رائنا نے کہاکہ بھارتی آرمی چیف منوج مِکونڈ ناراوانے نے پوری طرح سے فوجی تیاریوں کی یقین دہانی کرائی ہے، لیکن حکومت ہند معاملات کو واضح کرنے کے لئے بین الاقوامی فورموں پر کام کر رہی ہے۔ جلد ہی یہ معاملہ کسی بھی طرح حل ہوجائے گا۔
