اسلام آباد (آن لائن)سابق صدر پرویز مشرف سنگین غداری فیصلے پر پریس کانفرنسز کا معاملہ، سپریم کورٹ میں وفاقی وزرا فردوس عاشق اعوان، فروغ نسیم، اٹارنی جنرل انور منصور خان و دیگر کے خلاف توہین عدالت کی درخواست دائر کردی گئی ہیں۔

سپریم کورٹ میں توہین عدالت کی کاروائی کے لئے درخواست امجد حسین اور شاہد علی آفریدی ایڈووکیٹ کی طرف سے دائر کی گئی ہے۔ درخوست میں موقف اپنایا گیا ہے کہ توہین عدالت کے مرتکب افراد عوامی عہدوں پر فائز ہیں اور حکومت کی نمائندگی کرتے ہیں، جن افراد نے 17 اور 18 دسمبر کو پریس کانفرنس کی،ان افراد نے نہ صرف عدالت کا تمسخر اڑایا بلکہ فاضل جج کی بھی تضحیک کی اور ان کے خلاف نفرت انگیز اسٹیٹمنٹ دی،قانون کے تحت کسی بھی شخص کو جج کو اسکینڈلائز کرنے یا فیصلے کی بنیاد پر تضحیک کرنے اختیار نہیں،نامعلوم وجوہات کی بنا پر اداروں کو لڑانے اور بحران پیدا کرنے کی مذموم کوشش کی گئی ،حکومتی افراد کی جانب سے مفرور مجرم کی حمایت کرنا خلاف قانون ہے،کوئی بھی عدالتی فیصلہ نیک نیتی اور قانون کی بنیاد پر تصور کیا جاتا ہے،درخواست میں استدعا کی گئی ہے کہ عدالت ان تمام افراد کے خلاف آئین کے آرٹیکل 204 اور توہین عدالت کے تحت کارروائی کرنے سمیت ان افراد کو عوامی عہدوں کے لیے نااہل قرار دیا جائے۔درخواست میں میڈیا چینلز کو بھی فریق بنایا گیا ہے۔