صنعاء (این این آئی)یمن کے وزیر اطلاعات معمر الاریانی نے باور کرایا ہے کہ ایران نواز حوثی ملیشیا اپنے ذرائع ابلاغ کے ذریعے فرضی کامیابیوں کی تشہیر کر رہی ہے ،اس سلسلے میں وہ کئی ماہ قبل ہونے والی ایک ناکام کارروائی کی پرانی وڈیوز کو استعمال کر رہی ہے۔میڈیارپورٹس کے مطابق اس بات کا انکشاف الاریانی نے اپنی سلسلہ وار ٹویٹس میں کیا۔ یمنی وزیر اطلاعات کے مطابق

حوثی ملیشیا کی جانب سے فرضی کامیابیوں کے پروپیگنڈے کا مقصد اپنی سیاسی اور عسکری بے بسی اور عوام کی جانب سے الگ تھلگ کر دئیے جانے پر پردہ ڈالنا ہے۔ حوثی ملیشیا اپنے عناصر کا دم توڑتا مورال بحال کرنا چاہتی ہے تا کہ تہران میں اپنے آقائوں کی ایجنٹی اختیار کر کے شروع کی جانے والی جنگ جاری رکھی جا سکے۔الاریانی نے انکشاف کیا کہ حوثی ملیشیا نے اپنے دعوں کو سچ ثابت کرنے کے لیے ایک پرانی وڈیو اور قیدیوں کے مناظر کو استعمال کیا ہے جو کئی ماہ قبل عمل میں آنے والی ایک ناکام کوشش سے متعلق ہے۔ کارروائی کی یہ کوشش کتاب کے محاذ پر عمل میں لائی گئی تھی جس کو اس وقت یمنی فوج نے اتحادی طیاروں کی معاونت سے پسپا کر دیا تھا۔ اس دوران حوثی ملیشیا کی طرف سے عائد حصار کو توڑ دیا گیا تھا اور باغیوں کے الصماد بریگیڈ 3 کا مکمل طور پر خاتمہ کر دیا گیا۔یمنی وزیر اس بات کی تصدیق کی کہ ایران نواز باغی ملیشیا کو گذشتہ چند ماہ کے دوران مختلف محاذوں پر کاری ضربیں لگیں اور ان کے نتیجے میں حوثیوں کو بھاری جانی نقصان اٹھانا پڑا۔