ٹوکیو(این این آئی)جاپانی وزیراعظم شنزو آبے نے 14 ستمبر کو سعودی عرب میں تیل کی دو تنصیبات پر ہونے والے حملے کو انتہائی قابل مذمت جرم قرار دیا ہے اورکہاہے کہ اس کارروائی نے عالمی معیشت کے نظام کو یرغمال بنا لیا۔غیرملکی خبررساں ادارے کے مطابق

اقوام متحدہ کی جنرل اسمبلی سے خطاب کرتے ہوئے آبے نے مشرق وسطی کی صورت حال پر تشویش کا اظہار کیا۔ انہوں نے ایران پر زور دیا کہ وہ دانش مندانہ اقدامات کرے۔تاہم جاپانی وزیراعظم نے اس فریق کی جانب اشارہ نہیں کیا جس کو ان کا ملک آرامکو حملے کا ذمے دار سمجھتا ہے۔ واضح رہے کہ امریکا، سعودی عرب اور بڑی یورپی طاقتیں ایران پر اس حملے میں ملوث ہونے کا الزام عائد کرتی ہیں۔اس سے قبل سعودی عرب کے وزیر مملکت برائے امور خارجہ عادل الجبیر نے بتایا کہ ان کا ملک آرامکو حملے کی تحقیقات مکمل ہونے کے بعد ایران کو جواب دینے کے لیے تمام آپشنز پر غور کرے گا۔نیویارک میں اقوام متحدہ کے اجلاس میں شرکت سے قبل بات کرتے ہوئے وزیر خارجہ نے کہا کہ ابتدائی تحقیقات میں یہ بات سامنے آئی ہے کہ آرامکو تنصیبات پر میزائل حملوں کا منبع ایران ہے۔ سعودی وزیر نے کہا کہ ہم ایران کو جواب دینے کے لیے سفارتی محاذ پر کام کر رہے ہیں۔ خطے کو عدم استحکام سے دوچار کرنے کے ایرانی رویے کو روکنے کے لیے تمام ضروری اقدامات کیے جائیں گے۔

موضوعات:سعودی عرب،جاپان،شنزو آبے،آرامکو