واشنگٹن(این این آئی)امریکی وزیر خارجہ مائیک پومپیونے کہاہے کہ اقوام متحدہ کی جنرل اسمبلی کی کارروائیوں کے دوران ان کا ملک ایران کا مقابلہ کرنے کے سلسلے میں بین الاقوامی معاونت حاصل کرنے کی کوشش کرے گا۔میڈیارپورٹس کے مطابق ایک انٹرویومیں پومپیو نے باور کرایا کہ صدر ٹرمپ اور میں ذاتی طور پر سفارت کاری کو کامیاب ہونے کے لیے تمام تر مواقع دینا چاہتے ہیں۔انہوں نے کہا کہ ہم امید کرتے ہیں کہ اقوام متحدہ ایک فیصلہ کن موقف اختیار کرے گی۔پومپیو نے ایک بار پھر اس موقف کو دہرایا کہ سعودی عرب میں
تیل کی تنصیبات کو ایرانی حملے میں کروز میزائلوں کے ذریعے نشانہ بنایا گیا۔انہوں نے کہاکہ ہمارے پاس کافی شواہد ہیں جو یہ ثابت کرتے ہیں کہ یہ حملہ ایران کے اندر تیار کردہ میزائل سسٹم کے ذریعے کیا گیا۔ مجھے نہیں معلوم کہ حملے میں تہران کے ملوث نہ ہونے سے متعلق کوئی ایرانی وزیر خارجہ کے بیان کو کیوں سن رہا ہے؟ ان (جواد ظریف) کا ایران کی خارجہ پالیسی سے کوئی تعلق نہیں۔انہوں نے کئی دہائیوں تک جھوٹ بولا اور پھر مستعفی ہو گئے۔ ان کی بات کی اتنی حیثیت بھی نہیں کہ اس کا جواب دیا جائے۔
