مقبوضہ غزہ (این این آئی)غزہ میں حماس کے زیر انتظام فلسطینی وزارت صحت کے اعلان کے مطابق جمعے کے روز غزہ پٹی کی سرحد پر احتجاج کے دوران اسرائیلی فوج کی فائرنگ سے زخمی ہونے والا فلسطینی نوجوان چل بسا۔غیرملکی خبررساں ادارے کے مطابق وزارت صحت نے بتایا کہ 25 سالہ بدر ابو موسی سر میں گولی لگنے کے بعد غزہ پٹی کے جنوب میں ایک ہسپتال میں زیر علاج تھا۔ابو موسی ان 6000 فلسطینیوں میں
شامل تھا جنہوں نے جمعے کے روز غزہ اور اسرائیل کے درمیان سرحد پر ہفتہ وار احتجاجی ریلی میں شرکت کی۔وزارت کے مطابق احتجاج کے دوران 42 مظاہرین زخمی ہوئے۔ اسرائیلی فوج کا کہنا ہے کہ سرحدی باڑ پر مظاہرین کی جانب سے دستی بم پھینکے جانے کے دوران ایک اسرائیلی فوج معمولی زخمی ہو گیا جب کہ اسرائیلی فوج کی ایک گاڑی کو بھی نقصان پہنچا۔غزہ پٹی کی سرحد پر فلسطینیوں کے ہفتہ وار احتجاج کا آغاز گذشتہ برس ہوا تھا۔ اس کا مقصد غزہ پٹی پر 12 برسوں سے مسلط اسرائیلی محاصرے کو توڑنا ہے۔
