لندن(سی پی پی) کشمیریوں کی ایک بڑی تعداد نے لندن میں دفعہ 370کی منسوخی کے بھارتی اقدام کے خلاف احتجاجی مظاہرہ کرتے ہوئے عالمی برادری سے مطالبہ کیا کہ وہ بھارت کی طرف سے کشمیر کے بارے میں اقوام متحدہ کی قراردادوں کی خلاف ورزیوں کانوٹس لے۔کشمیرمیڈیا سروس کے مطابق مظاہرین نے لندن میں بھارتی ہائی کمیشن کے سامنے احتجاج کیا اور انہوں نے ہاتھوں میں بینرز اورپلے کارڈز اٹھا رکھے تھے جن پر ’’بھارت اقوام متحدہ کی قراردادوں
پر عملدرآمدکرو‘‘، ’’کشمیر سے نکل جائو‘‘ جیسے نعرے درج تھے۔ پروفیسر نذیر احمد شاہ اور قونصلرز امجد عباسی اور راجہ اسحق مظاہرین میں شامل تھے۔ دریں اثناء امریکہ میں مقیم مسلم ایڈوکیسی گروپ نے بھارتی آئین کی دفعہ 370کی منسوخی کے خلاف واشنگٹن میں بھارتی سفارتخانے کے سامنے احتجاجی مظاہرہ کرنے کا اعلان کیا ہے۔ گروپ نے ایک بیا ن میں کہاکہ نیویارک اور شکاگو میں بھی بھارتی قونصل خانوں کے سامنے احتجاج کیا جائے گا۔
