لاہور( این این آئی) پاکستان مسلم لیگ (ن) کے قائد محمد نواز شریف سے کوٹ لکھپت جیل میں اہل خانہ اور ذاتی معالج نے ملاقات کی ، پارٹی کارکنا ن نواز شریف سے اظہار یکجہتی کیلئے کوٹ لکھپت جیل کے باہر موجود رہے اور ان کے حق میں نعرے لگاتے رہے ۔ کوٹ لکھپت جیل میں قید مسلم لیگ (ن) کے قائد محمد نواز شریف سے مریم نواز سمیت خاندان کے افراد نے ملاقات کر کے ان کی خیریت دریافت کی جبکہ ذاتی معالج ڈاکٹر عدنان نے طبی معائنہ کیا ۔مسلم لیگ (ن) کے صدر محمد شہباز شریف چیئرمین سینیٹ کے خلاف تحریک عدم اعتماد کی
وجہ سے اسلام آباد میں موجودگی کے باعث ملاقات کے لئے جیل نہ آ سکے ۔ مریم نواز نے مجموعی سیاسی صورتحال پر تبادلہ خیال اور اپنے نقطہ نظر سے آگاہ کیا ۔ مریم نواز نے اپنے والد کو چوہدری شوگر مل کیس میں نیب میں پیشی کے حوالے سے آگاہ کرنے سمیت دیگر کیسز پر بھی تبادلہ خیال کیا ۔مریم نواز نے اپنے والد کو اگست میں مختلف اضلاع میں شیڈول ورکرز کنونشنز کے حوالے سے بھی آگاہ کیا اور ان سے رہنمائی حاصل کی ۔شریف خاندان کے افراد کی کوٹ لکھپت جیل آمد پر کارکنوں کی جانب سے ان کی گاڑیوں پر پھولوں کی پتیاں نچھاور کئے گئے اوران کے حق میں نعرے لگا ئے گئے ۔
