اسلا آباد (این این آئی)وفاقی وزیر مراد سعید نے این ایچ اے کا ریونیو 100 بلین تک لے جانے کااعلان کرتے ہوئے کہا ہے کہ ملک پر اتنا قرضہ حکمرانوں کی شاہ خرچیوں کی وجہ سے ہوا، ماضی میں ٹھیکوں میں کافی شکایات بل ادائیگی سے متعلق ہوتی تھیں، اب ای بلنگ کے ذریعے معاملہ ختم ہو جائیگا،یکم اگست سے پورے پاکستان کی شاہراہوں پر کلین اینڈ گرین پاکستان کی مہم شروع کی جائے گی، آئندہ ہفتے پاکستانی وفد یو اے ای جائیگا۔
انہوں نے کہاکہ پاکستان کی ڈرائیونگ اتھارٹی کے جاری لائسنس کو یو اے ای میں بھی تسلیم کیا جائیگا، پاکستان ہمیشہ دہشتگردی کے خلاف جنگ میں قربانیاں دی ہیں، پوری قوم افواج پاکستان کے ساتھ کھڑی ہے۔ پیر کو وفاقی وزیر مواصلات مراد سعید نے ای بلنگ سسٹم کا افتتاح کیا اس موقع پر سیکرٹری مواصلات جواد رفیق بھی موجود تھے۔ وفاقی وزیر نے کہاکہ این ایچ اے میں ای بلنگ کا باقاعدہ آغاز کر دیا گیا ہے۔ انہوں نے کہاکہ ایک سال مکمل ہونے جا رہا ہے اور ہم نے ادارے میں کون سی اصلاحات لائیں۔ انہوں نے کہاکہ ہم ساتھ ساتھ شفافیت لا رہے ہیں اور احتساب کا عمل بھی جاری رکھے ہوئے ہیں۔ انہوں نے کہاکہ ہم نے 100 روزہ پلان میں ای بلنگ شامل تھا جس کا آج آغاز کر دیا گیا ہے۔ انہوں نے کہاکہ ماضی میں ٹھیکوں میں کافی شکایات بل ادائیگی سے متعلق ہوتی تھی، اب ای بلنگ کے ذریعے یہ معاملہ ختم ہو جائے گا۔ انہوں نے کہاکہ ای بلنگ سے کمیشن کلچر کا خاتمہ ہو گا۔ انہوں نے کہاکہ ہم نے میڈیا اور عوام کے سامنے یہ منصوبہ رکھ دیا ہے جس کا عوام احتساب کر سکیں گے۔ انہوں نے کہاکہ این ایچ اے میں 700 کروڑ سے زائد رقم ریکوری کر چکے ہیں، این ایچ اے کا ریونیو بڑھے گا اور 100 بلین تک پہنچاؤں گا۔ انہوں نے کہاکہ 43 بلین ریونیو میں اضافہ ہوا، 448 کنال زمین واگزار کروائی ہے۔ انہوں نے کہاکہ یکم اگست سے پورے پاکستان کی شاہراہوں پر کلین اینڈ گرین پاکستان کی مہم شروع کی جائے گی۔ انہوں نے کہاکہ ملک پر اتنا قرضہ حکمرانوں کی شاہ خرچیوں کی وجہ سے ہوا،
وزیراعظم عمران خان نے کفایت شعاری کا سبق دیا اور اس پر عمل کیا گیا، آپ نے ملک کو لوٹا تھا اور ہم نے نیب کو دستاویزات فراہم کئے ہیں۔ انہوں نے کہاکہ این ایچ اے کے تمام ملازمین کی تفصیلات این ایچ اے کی ویب سائٹ پر جاری کی جائیں گی۔ انہوں نے کہاکہ ملازمین سے متعلق تقرر اور تبادلے سمیت کتنی جائیداد اور کتنے اثاثوں کے مالک ہیں،اب ہم پاکستان کے صوبے میں ڈرائیونگ اتھارٹی قائم کرنے جا رہے ہیں۔انہوں نے کہاکہ ہم یو اے ای کے ساتھ ملکر اس منصوبے کو آگے لے کر چلیں گے،آئندہ ہفتے پاکستانی وفد یو اے ای جائیگا۔ انہوں نے کہاکہ پاکستان کی ڈرائیونگ اتھارٹی کے جاری لائسنس کو یو اے ای میں بھی تسلیم کیا جائیگا۔ وفاقی زیر نے کہاکہ یو اے ای کا ڈرائیونگ لائسنس کا نظام پاکستان میں متعارف کرانے جا رہے ہیں۔ انہوں نے کہاکہ پاکستان ہمیشہ دہشتگردی کے خلاف جنگ میں قربانیاں دی ہیں، پوری قوم افواج پاکستان کے ساتھ کھڑی ہے، قبائلی اضلاع میں پر امن انتخابات کا عمل خوش آئند رہا۔
