اسلام آباد (این این آئی)پاکستان تحریک انصاف کے رہنما ہمایوں اختر نے دعویٰ کیا ہے کہ ویڈیو لیکس کے جن کرداروں کا ذکر جج صاحب نے اپنے بیان حلفی میں کیا ہے ان میں سے کچھ لوگ وعدہ معاف گواہ بن جائیں گے۔ایک انٹرویومیں ہمایوں اختر نے کہا کہ وزیراعظم سے ملاقات ہوئی ہے وہ بہت پرعزم ہیں۔ایک سوال پر انہوں نے کہاکہ  ویڈیو لیکس کے جن کرداروں کا ذکر جج صاحب نے اپنے بیان حلفی میں کیا ہے ان میں سے کچھ لوگ وعدہ معاف گواہ بن جائیں گے۔

پاکستان تحریک انصاف کے سینئر مرکزی رہنما ہمایوں اختر خان نے کہا ہے کہ ویڈیو لیکس کے جن کرداروں کا ذکر جج ارشد ملک نے اپنے بیان حلفی میں کیا ہے ان میں سے کئی وعدہ معاف گواہ بن جائیں گے، تحریک انصاف کی جدوجہد کے بعد پیپلز پارٹی اور (ن) لیگ کواپنی موروثی سیاست کو آگے بڑھانے میں مشکلات کا سامنا ہے،مشکل حالات کے باوجود وزیر اعظم عمران خان چیلنجز سے نبرد آزما ہونے کیلئے پرعزم ہیں۔ اپنے ایک بیان میں انہوں نے کہا کہ تحریک انصاف کی حکومت تاریخ کی پہلی حکومت ہے جس نے  معیشت کو دستاویزی کرنے کیلئے اصلاحات کا غیر معمولی اور مشکل فیصلہ کیا۔ حکومت کو اس میں شدید مزاحمت کا سامنا ہے لیکن ہم اسٹیک ہولڈرز کو قائل کر لیں گے کہ اس کے بغیرمعیشت کی ترقی کا کوئی آپشن موجود نہیں۔ انہوں نے کہا کہ تاجرجی ڈی پی کا پچاس فیصد ہیں لیکن یہاں سے 17فیصد ٹیکس اکٹھا ہوتا ہے وہ بھی بینکوں اور انشورنس کمپنیوں سے آتا ہے، مڈل مین، ریٹیلرز اور ہول سیلرز اپنے حصے کا ٹیکس ادا کرنے کے لئے تیار نہیں۔ حکومت کسی سے محاذ آرائی نہیں کر رہی بلکہ حکومتی ٹیم شروع دن سے مذاکرات پر آمادہ ہے اور تاجروں سمیت مختلف شعبوں کے نمائندوں سے مذاکرات کے کئی دور ہو چکے ہیں۔ انہوں نے مزید کہا کہ ویڈیو لیکس کا اونٹ کس کروٹ بیٹھے گایہ تو آنے والا وقت ہی بتائے گا لیکن جج ارشد ملک نے اپنے بیان حلفی میں جن کرداروں کا ذکر کیا ہے ان میں سے کئی وعدہ معاف گواہ بن جائیں گے۔

اپوزیشن حکومت کی آڑ میں اداروں پر حملہ آور ہے لیکن پوری قوم اپنے اداروں کی پشت پر کھڑی ہے اور ان کی سازشیں کامیاب نہیں ہونے دی جائیں گی۔ ہمایوں اختر خان نے کہا کہ پیپلز پارٹی اور (ن) لیگ کی اگلی نسل کا خیال تھاکہ و ہ لوٹ مار کی دولت کے بل بوتے پر سیاست میں کامیاب ہو جائیں گے لیکن تحریک انصاف کی جدوجہد کی وجہ سے ان دنوں کواپنی موروثی سیاست کوآگے بڑھانے میں مشکلات کا سامنا ہے اس لئے ان کی چیخیں نکل رہی ہیں۔ مریم نواز نے ریت کی بنیادوں پر اپنی سیاست کی بلند عمارت کھڑی کرنے کی کوشش کی جوزمین بوس ہو چکی ہے۔ انہوں نے کہا کہ ہم نہیں چاہتے کہ سیاسی جماعتیں مقابلے سے آؤٹ ہوں لیکن پیپلز پارٹی اور (ن) لیگ اپنی سیاست کو خود اپنے ہاتھوں سے دفن کرنے پر تلی ہوئی ہیں۔

موضوعات:ہمایوں اختر