لاہور (آن لائن) دنیا بھر میں کرائم ریٹ کا تعین کرنے والے معتبر بین الاقوامی ادارے نمبیو Numbeo نے لاہور میں جرائم کی شرح میں مزید کمی کی تصدیق کی ہے۔ آج 10 جولائی کو جاری ہونے والے تازہ ترین کرائم انڈیکس میں لاہور کو 213 ویں نمبر پر ظاہر کیا گیا ہے۔ واضح رہے کہ نمبیو Numbeo مختلف انڈیکیٹرز کی بنیاد پر کرائم انڈیکس میں شہروں کی درجہ بندی کرتا ہے۔ جنوری 2019 میں لاہور کا کرائم ریٹ کے لحاظ سے دنیا کے دیگر شہروں میں 174 واں نمبر تھا اور 2018 میں

عالمی درجہ بندی میں لاہور کو شرح جرائم کے حوالے سے 138 نمبر پر ظاہر کیا گیا تھا۔ اس طرح چھ ماہ کے دوران کرائم انڈیکس میں لاہور نے مزید 39 درجے اور گزشتہ سال کے مقابلے میں 75 درجے کی بہتری حاصل کی۔ ششماہی رپورٹ میں کراچی کا 75 واں نمبر دیا گیا ہے۔ کرائم انڈیکس میں وینزویلا کا شہر کراکس بدستور دنیا کا خطرناک جبکہ ابوظہبی محفوظ ترین شہر قراردیا گیا ہے۔ سی سی پی او لاہور بی اے ناصر نے صوبائی دارالحکومت میں کرائم کنٹرول سٹریٹجی کی کامیابی اورجرائم کی شرح میں کمی پر اظہار اطمینان کرتے ہوئے اس عزم کا اظہار کیا ہے کہ لاہور پولیس کرائم کنٹرول میں مزید بہتری کے لئے کام جاری رکھے گی۔ انہوں نے کہا کہ لاہور پولیس کے افسر اور جوان تحسین کے مستحق ہیں جن کی کوششوں سے حالیہ عرصے کے دوران کرائم ریٹ میں نمایاں کمی آئی۔ عالمی ادارے کا تازہ انڈیکس لاہور پولیس کے لئے ایک اعزاز ہے۔ سربراہ لاہور پولیس نے کہا کہ روایتی اقدامات کی بجائے کوالٹی پولیسنگ کی طرف بڑھ رہے ہیں۔ سال 2018 میں اسی انڈیکس میں لاہور کرائم کے حوالے سے 138 نمبر پر تھا۔ جو اب 213 ویں نمبر پر چلا گیا ہے۔ وسائل میں کمی کے باوجود ایک سال میں کئی گنا بہتری آئی۔