کراچی(آن لائن)گورنر سندھ عمران اسماعیل سے کامیاب مزاکرات کے بعد کراچی کے تاجروں نے ہڑتال کی کال واپس لے لی۔تاہم تحفظات دور نہ ہونے کی صورت میں ہفتے کو ہڑتال کا عندیہ بھی دے دیا۔تفصیلات کے مطابق کراچی کے تاجروں کی ایکشن کمیٹی نے گورنر ہاؤس میں گورنر سندھ عمران اسماعیل سے ملاقات کی جس میں تاجروں کو درپیش مسائل پر بات چیت ہوئی ایکشن کمیٹی نے وفاقی بجٹ میں لگائے گئے ٹیکسوں پر اپنے تحفظات سے گورنر سندھ کو آگاہ کیا جبکہ گورنر سندھ نے تاجروں کے تحفظات دور کرانے کی یقینی دہانی کراتے

ہوئے ان سے ہڑتال کی کال واپس لینے کی درخواست کی جس پر تاجررہنماؤں نے ہڑتال کی کال واپس لے لی۔بعدازاں پریس کانفرنس کرتے ہوئے گور سندھ عمران اسماعیل نے کہا کہ ایکشن کمیٹی کے پیش کردہ 11مطالبات پر چیئرمین ایف بی آر شبر زیدی سے ٹیلی فون پر بات کی، چیئرمین ایف بی آر نے یقین دلایا کہ وہ تاجروں کے تحفظات دور کریں گے، جبکہ تاجر ایکشن کمیٹی کے ممبران نے کہا کہ وفاقی حکومت کی یقین دہانی پر وہ فی الفور ہڑتال کی کال واپس لے رہے ہیں تاہم مطالبات پور ے نہ ہوئے تو ہفتے سے ہڑتال کریں گے۔