اسلام آباد (این این آئی)پاکستان مسلم لیگ (ن)نے جج ارشد ملک کی مبینہ ٹیپ کے فورنزک جائزے کے حکومتی اعلان کی حمایت کردی۔ نجی ٹی وی سے گفتگو کرتے ہوئے سینیٹر مصدق ملک نے کہا کہ جج کی وڈیو اسلام آباد ہائی کورٹ میں پیش کی جائے گی۔مصدق ملک نے کہا کہ ہم نے ثابت کر دیا ہے کہ ہمارے ساتھ انصاف نہیں ہوا۔ انہوں نے کہاکہ جب یہ ویڈیو عدالت میں جائے گی تو اس کے ساتھ مزید شواہد بھی شامل کیے جائیں گے جن کا ذکر مریم نواز

نے اپنی پریس کانفرنس میں کیا اور جو ابھی تک منظر عام پر نہیں آئے۔انہوں نے کہا کہ اس سے قبل ایک وزیراعظم کو پھانسی کی سزا سنانے والے جج نے بعد میں کہا تھا کہ یہ فیصلہ دباؤ کے تحت کیا گیا تھا۔تحریک انصاف کے رہنما ہمایوں اختر خان نے کہاکہ اس قسم کی ٹیپس قانون کے مطابق شواہد کے طور پر نہیں پیش کی جاسکتیں۔انہوں نے کہاکہ ن لیگ کی قیادت میں دراڑ واضح ہوچکی ہے جس سے توجہ ہٹانے کے لئے یہ ٹیپ لائی گئی ہے۔