ممبئی (نیوز ڈیسک) بالی ووڈ اداکار سلمان خان کی اپنی بہن ارپیتا خان سے محبت سے پوری انڈسٹری واقف ہے۔سلو بھائی کیلئے اپنی بہن کس قدر اہم ہیں، اس کا اندازہ اس امر سے لگایا جاسکتا ہے کہ سلو بھائی نے معروف ڈائریکٹر کرن جوہر سے دوستی چھوڑ دی ہے حتیٰ کہ کرن جوہر کی فلم ”شدھی“ چھوڑنے کی وجہ بھی ارپیتا خان بنیں۔ دراصل کرن جوہر نے رواں برس کے آغاز میں متنازعہ پوڈ کاسٹ شو اے آئی بی میں شرکت کی جہاں پر سلمان خان کی بہن ارپیتا کا بھی مذاق اڑایا گیا اور کرن جوہر نے کسی قسم کی خفگی یا ناراضگی ظاہر نہ کی۔ کرن کے اس رویئے نے سلمان کو بے حد دکھی کیا اور انہوں نے کرن جوہر کے ساتھ بات چیت بند کردی۔ سلمان خان نے جوں ہی شدھی چھوڑنے کا اعلان کیا تو اس کے فوری بعد کرن جوہر کی جانب سے یہ اعلان سامنے آیا کہ ان کی فلم شدھی میں عالیہ بھٹ اور ویرون دھاون کام کریں گے تاہم دونوں نے ہی وضاحت نہ کی کہ فلم کی کاسٹ میں تبدیلی کی وجہ کیا بنی۔