ریاض(اے این این )سعودی وزارت محنت نے مزید 7 شعبوں میں غیر ملکیوں کے کام کرنے پر پابندی عائد کر دی ہے۔ سعودی نشریاتی ادارے کے مطابق وزارت محنت کی جانب سے جاری کردہ اعلان میں کہا گیا ہے کہ گاڑیاں اٹھانے والی ونچ ڈرائیور ، انفرادی منی ٹرک(ڈائنا) ، متوسط لوڈنگ گاڑیاں، لاجسٹک سروسز(سامان منتقل کرنے والے ادارے ) اور ڈاک انٹری کلرک کے پیشوں میں غیر ملکی ملازمت کے اہل نہیں ہوں گے یہ شعبے سعودیوں کیلئے مخصوص کر دیئے گئے ہیں ۔
جن پر عمل درآمد جلد اور مرحلہ وار کیا جائے گا۔مذکورہ اداروں میں ریجن میں پہلے ہی غیر ملکیوں پر کام کرنے کی پابندی لگائی گئی تھی۔ دوسرے مرحلے کا آغاز یکم رجب 1440 ہجری سے کیاجائے گا جس میں ٹریول اینڈ ٹورازم اور شاپنگ مالز میں دکانوں اور اسٹالز پر کام کرنے والا عملہ شامل ہے۔تیسرا مرحلہ یکم شعبان 1440 ہجری سے کیاجائے گا جس میں انشورنس کے ادارے اور ذیلی دفاتر میں کام کرنے والے کلرک اور دیگر عملہ، ڈاک خانوں کے ذیلی دفاتر میں سعودائزیشن کی جائے گی۔
