سیؤل(آئی این پی)بین الاقوامی میڈیا کے مطابق ملائیشیا میں تعینات جنوبی کورین سفارت خانے کے ایک اہلکار کو پاکستانیوں کو کوریا کے جعلی ویزے جاری کرنے کے جرم میں قید کی سزا سنا دی گئی۔کورین ہیرالڈ کی ایک رپورٹ کے مطابق جنوبی کوریا کے سفارتی اہلکار پر الزام تھا کہ اس نے گذشتہ تین سال کے دوران 20 مواقع پر ان پاکستانیوں کو جعلی ویزے جاری کیے، جن کے پاس مطلوبہ دستاویزات نہیں تھیں۔اس مقصد کے لیے اس نے سفارت خانے کے انٹرانیٹ آئی ڈی اور پاس ورڈ کا غلط

استعمال کیا۔رپورٹ کے مطابق سیؤل میں سینٹرل ڈسٹرکٹ کورٹ نے جرم ثابت ہونے پر سفارت خانے کے اہلکار کو 18 ماہ قید کی سزا سنائی گئی ہے۔اپنے فیصلے میں جج لی سانگ جو نے قرار دیا کہ سفارتی اہلکار نے دھوکہ دہی سے کام لیا اور امیگریشن کے معاملات میں ہیرپھیر کی، جس پر وہ سخت سزا کا مستحق ہے۔تاہم انہوں نے کہا کہ وہ اس بات کو مدنظر رکھ رہے ہیں کہ چونکہ مذکورہ اہلکار نے اس سارے عمل میں کوئی ذاتی فوائد حاصل نہیں کیے اور اس نے اپنی غلطی کا اعتراف بھی کرلیا ہے۔