لاہور (نیوز ڈیسک) قومی ہاکی ٹیم آسٹریلیا میں چار ملکی سیریز میں شرکت کے بعد وطن واپس پہنچ گئی۔ایئرپورٹ پر پاکستان ہاکی فیڈریشن کاکوئی عہدیدار کھلاڑیوں کے استقبال کو نہ آیا تھا۔ 23 رکنی قومی ہاکی ٹیم رات دو بجے علامہ اقبال انٹرنیشنل ائیرپورٹ پہنچی توہاکی فیڈریشن کا ایک بھی عہدیدار کھلاڑیوں کے استقبال کے لیے موجود نہ تھا۔ کھلاڑیوں کو ائیرپورٹ پر مختلف دشواریوں کا سامنا بھی کرنا پڑا اورکوچ شہناز شیخ کا سامان بھی نہ پہنچ سکا۔ آخرکار قومی کھلاڑیوں کو گھر جانے کیلئے کسی قسم کی سواری بھی فیڈریشن کی جانب سے مہیا نہ کی گئی تھی، اسی لئے جب کھلاڑی گھر جانے لگے تو کسی نے ٹیکسی کا رخ کیا اور کسی نے اپنی گاڑی کا۔ ایئرپورٹ پر کھلاڑیوں کو کسی قسم کی سکیورٹی بھی نہ فراہم کی گئی۔