اسلام آباد (نیوز ڈیسک) معروف مذہبی و سیاسی جماعت کے رہنما ٹکٹوں کے معاملے پر مسجد کا احترام ہی بھول گئے، سوشل میڈیا پر ایک ویڈیو وائرل ہے جس میں معروف سیاسی و مذہبی جماعت کے رہنما و کارکنان مسجد میں گتھم گتھا ہو گئے۔ انتخابات کی آمد آمد ہے، واضح رہے کہ مذہبی جماعتوں کے اتحاد ایم ایم اے میں بھی ٹکٹوں کی تقسیم پر شروع ہونے والا تنازعہ مسجدوں میں جا پہنچا۔
اس ویڈیو میں مذہبی و سیاسی جماعت کے رہنما نے مسجد میں کھڑے ہو کر مرکزی قیادت پر تنقید کرتے ہوئے کہا کہ ایک ایک حلقے میں اتنے امیدوار کھڑے ہیں، انہوں نے کہا کہ پارٹی اختلافات کا شکار ہو چکی ہے جس سے یہ پتہ چلتا ہے کہ ٹکٹوں کی تقسیم میں میرٹ کی دھجیاں اڑا دی گئیں، اس مذہبی رہنما نے مسجد کے صحن میں اپنی تقریر جاری رکھی جس پر وہاں جھگڑا شروع ہو گیا اور کارکنان یہ بھول گئے کہ وہ مسجد میں کھڑے ہیں۔
