اسلام آباد(مانیٹرنگ ڈیسک)پاکستان سے علاج کیلئے بھارت جانے والی 7 سالہ زینب لدھیانہ کے ہسپتال میں انتقال کر گئی ۔تفصیلات کے مطابق پاکستان سے علاج کیلئے بھارت جانیوالی 7 سالہ بچی زینب بھارت کے شہر لدھیانہ کے ہسپتال میں انتقال کر گئی ہے۔ زینب کے دل میں تین سوراخ تھے اور وہ فیصل آباد کے انسٹی ٹیوٹ آف کارڈیالوجی میں زیر علاج تھی جہاں ڈاکٹروں نے
زینب کی سرجری کی صورت میں اس کی جان کو شدید خطرہ قرار دیا تھا۔جس کے بعد اس کے والد نے بھارت کے ایک ہسپتال میں رابطہ کیا جہاںڈاکٹرزنے انکو زینب کے تسلی بخش علاج کی یقین دہانی کرواتے ہوئے یقین دلایا تھا کہ ہسپتال میں ایسے مرض میں مبتلابچوں کا علاج کیا جاتاہے جس کے بعد علاج پر تقریبا 25 لاکھ روپے خرچ آنا تھا اور امدا د وصول ہونے کے بعد زینب کے والد گزشتہ ہفتے اسے لیکر بھارت چلے گئے ۔ گزشتہ روز ڈاکٹرز نے زینب کی سرجری کرتے ہوئے اسے آئی سی یو میں منتقل کر دیا تھا۔والد کے مطابق ڈاکٹروں نے بتایا تھا کہ زینب کی سرجری کامیاب ہوئی ہے، لیکن آئندہ 24 گھنٹے بچی کے لیے اہم ہیں۔ لیکن وہ جانبر نہ ہو سکی اور انتقال کر گئی ۔ ہسپتال انتظامیہ نے زینب کی میت اس کے والدین کے حوالے کر دی ہے۔ زینب کی موت کے غم میں نڈھال اسکے والد اب بھارت میں ایک نئی مصیبت میں پھنس چکے ہیں اور زینب کی میت واپس لانے کیلئے قانونی تقاضے پورے کرنے کی آڑ میں ان کیلئے وہاں کی انتظامیہ اور پولیس مشکلات کھڑی کر رہی ہے۔ زینب کے والد نے اپنے ویڈیو پیغام میں الزام عائد کیا ہے کہ مکمل سفری دستاویزات ہونے کے باوجود لدھیانہ کی پولیس ان کو کبھی ایک دفتر کے چکر لگوارہی ہے اور کبھی دوسرے کے، زینب کے والد نے اپنی ننھی بیٹی کی میت وطن واپس لانے کیلئے پاکستانی سفارتخانے سے مدد کی اپیل کرتے ہوئے کہا ہے کہ پاکستانی سفارتخانہ زینب کی میت پاکستان واپس لانے کیلئے ان کی مدد کرے۔
