اسلام آباد(مانیٹرنگ ڈیسک)کراچی کے حلقہ این اے 245میں امیدوار عامر لیاقت حسین کی جانب سے چھپائی گئی دوسری شادی کا بھانڈا پھوٹ گیا۔مقامی اخبار کی رپورٹ کے مطابق الیکٹرانک میڈیا میں مسلسل تنازعات کی زد میں رہنے والے عامر لیاقت حسین نے دوسری شادی کو چھپایا تاہم نجی ٹی وی کے الیکشن سیل کی تحقیقات کے مطابق انہوں نے دوسرا نکاح کیا ہوا ہے

جو 5مئی 2017کو مفتی عبدالقادر نے پڑھایا۔ نکاح نامے میں دولہا کی رہائش پرائم بیچ ویو اپارٹمنٹ فلیٹ نمبر 210کلفٹن کراچی جنوبی درج ہے جبکہ دلہن طوبیٰ انوار کی رہائش گلستان جوہر بلاک 2ضلع شرقی ہے۔ دلچسپ بات یہ ہے کہ نکاح چھپانے کی غرض سے اس کی رجسٹریشن شہر کے تیسرے علاقے سپر مارکیٹ لیاقت آباد میں 12روز بعد 17جولائی 2017کو کرائی گئی۔ عامر لیاقت حسین کا شناختی کارڈ نمبر 4230152990453ہے ان کی اہلیہ سیدہ طوبیٰ انوار نکاح کے بعد شناختی کارڈ پر شوہر کے خانے میں عامر حسین کا نام کراچکی ہے۔ سیدہ طوبیٰ کا پاسپورٹ نمبر سی ڈبلےو 5177142ہے اور ان کا شناختی کارڈ نمبر 4210199077148ہے۔ سیدہ طوبیٰ نجی ٹی وی چینل میں چار سال تک اسسٹنٹ منیجر کوآپریٹو افیئرز کے طور پر منسلک رہ چکی ہیں۔ عامر لیاقت نے اپنی تنخواہ 54لاکھ 621روپے ظاہر کی ہے اور 2015میں انکم ٹیکس کی ادائیگی 90لاکھ 5ہزار بتائی جبکہ 2017میں انکم ٹیکس کی ادائیگی تاحال نہیں کی گئی ہے۔واضح رہے کہ اس سے قبل ن لیگ کے سابق وفاقی وزیر ریلوے خواجہ سعد رفیق کی بھی دوسری شادی کا انکشاف سامنے آیا تھا۔ خواجہ سعد رفیق نے سرکاری ٹی وی پی ٹی وی کی اینکر شفق حرا سے دوسری شادی کی تھی جس کے بارے میں انہوں نے اپنے کاغذات نامزدگی میں اعتراف کیا  جبکہ فواد چوہدری کی بھی دوسری شادی کا انکشاف گزشتہ روز اس وقت سامنے آیا جب ان کے کاغذات نامزدگی مسترد کرتے ہوئے الیکشن ٹریبونل کے جج نے انہیں غلط بیانی کرنے پر نا اہل قرار دیا تھا۔