سی چھوانگ (آئی این پی ) چینی صدر شی جن پنگ نے عوامی خوشحالی کے لیے اقدامات پر زور دیتے ہوئے کہا ہے کہ ، غربت کا خاتمہ اور اعتدال پسند خوشحال معاشرے کی کامل تکمیل کی جائے گی، کسی بھی قومیت ،خاندان یا فرد کو پیچھے نہیں چھوڑا جائے گا۔ چائنہ ریڈیو انٹرنیشنل کے مطابق چینی صدر شی جن پنگ جو چینی کمیونسٹ پارٹی کی مرکزی کمیٹی کے جنرل سیکرٹری اور مرکزی فوجی کمیشن کے چیرمین بھی ہیں۔
انہوں نے جشن بہار کی آمد کے موقع پر گیارہ تاریخ کو جنوب مغربی چین کے صوبہ سی چھوانگ کے پہاڑی علاقے کا دورہ کیا۔ شی نے مذکورہ علاقے میں رہائش پذیر ای اقلیتی قومیت کے باشندوں کے کچھ گھروں کا دورہ کیا اور ان کے معیار زندگی کو بہتر بنانے پر زور دیا۔اسی روز شی نے دا لیانگ شان پہاڑی علاقے میں واقع دو گاوں کا دورہ کیا اور مقامی باشندوں سے ان کی طرز زندگی اور رہن سہن سے متعلق پوچھا ۔اس موقع پر انہوں نے اس عزم کا اعادہ کیا کہ غربت کا خاتمہ کیا جائے گا۔ شی نے کہا کہ اعتدال پسند خوشحال معاشرے کی کامل تکمیل کی جائے گی اور اس عمل میں کسی بھی قومیت ،خاندان یا فرد کو پیچھے نہیں چھوڑا جائے گا۔ چینی صدر نے مقامی سرکاری اہلکاروں پر زور دیا کہ وہ ہمیشہ کی طرح عوام کی خوشحال زندگی کو اپنا مشن قرار دیں اور اس ہدف کے لیے انتھک کوششیں جاری رکھیں۔
