ریاض (نیوزڈیسک )سعودی عرب کے حامی ہیکرز نے ایران کے العلم ٹی وی کی سوشل میڈیا ویب سائٹس کو ہیک کر کے وہاں یمن پر سعودی حملوں کی حمایت میں مواد شائع کر دیا۔عربی زبان کے ایرانی چینل العلم نے الزام عائد کیا ہے کہ اتوار کو کیے جانے والے ’سائبر اٹیک‘ کے پیچھے سعودی حکومت کا ہاتھ ہے۔ اس کی توجیہ پیش کرتے ہوئے چینل کا کہنا تھا کہ اس کی ویب سائٹس یمن پر سعودی قیادت میں کیے جانے والے فضائی حملوں سے متعلق تنقیدی نشریات کی پاداش میں ہیک کی گئی ہیں۔خیال رہے کہ چھبیس مارچ سے سعودی عرب کی قیادت میں ایک بین الاقوامی عسکری اتحاد یمن میں حوثی باغیوں کے ٹھکانوں پر فضائی حملے کر رہا ہے۔ حوثی باغی دارالحکومت صنعاء اور جنوبی بندرگاہی شہر عدن سمیت ملک کے کئی شہروں پر قابض ہو چکے ہیں۔ بین الاقوامی طور پر تسلیم شدہ ملکی صدر عبدربہ منصور ہادی سعودی دارالحکومت ریاض میں پناہ لیے ہوئے ہیں۔ سعودی عرب کا الزام ہے کہ ایران ان حوثی باغیوں کو مدد فراہم کر رہا ہے۔ اس صورت حال کے باعث ریاض اور تہران کے تعلقات کشیدہ ہو چکے ہیں۔چینل کا اتوار کے روز یہ بھی کہنا تھا کہ وہ ویب سائٹس کا کنٹرول دوبارہ حاصل کرنے کی کوشش کر رہا ہے۔ اس کا یہ بھی کہنا تھا کہ اس نے عارضی طور پر ایک نئے ٹوئٹر اکاو¿نٹ کے علاوہ ایک نیا یو ٹیوب اکاو¿نٹ بھی کھول لیا ہے۔سعودی عرب کی حکومت کی جانب سے اس ہیکنگ کے بارے میں کوئی رد عمل تاحال سامنے نہیں آیا۔