ممبئی (نیوز ڈیسک)بھارتی اداکارہ انوشکا شرما نے کہا ہے کہ بالی ووڈ میں زیادہ تر مردوں کے موضوع پر فلمیں بنائی جاتی تھیں لیکن میری کوم اور کوئین کی کامیابی کے بعد انڈسٹری میں ایسی فلموں کا رجحان بڑھ رہا ہے اور متعدد ہدایتکار خواتین کے موضوعات پر بھی فلمیں بنا رہے ہیں جو کہ خوش آئند بات ہے ، میں بھی ایسی فلموں کی حمایت کرتی ہوں۔ اپنی فلم “این ایچ 10” کی ایک تشہیری تقریب میں بات کرتے ہوئے انہوں نے کہا کہ فلم کی ساری کاسٹ نے بے حد محنت کی ہے۔امید ہے کہ فلم مداحوں کو پسند آئے گی اور اچھا بزنس کرے گی۔انوشکا نے کہاکہ وہ ایسی فلم میں ہی کام کرنے کی حامی بھرتی ہیں جس میں انہیں اپنا کردار دلچسپ لگتا ہے۔انوشکا نے بتایا کہ فلم میں وہ ایک بیوقوف لڑکی بنیں گی جو بہت غلطیاں کرتی ہے۔ فلم کی دیگر کاسٹ میں نیل بھوپالم اور درشن کمار شامل ہیں ،فلم کی ہدایات نودیپ سنگھ نے دی ہیں۔