لاہور (آئی این پی)لاہور کے علاقہ گرین ٹاؤن میں 8سالہ بچہ گلے پر پتنگ کی ڈور پھرنے سے زخمی ہو گیا جسے طبی امداد کے لئے ہسپتال منتقل کر دیا گیا ، وزیر اعلیٰ پنجاب نے واقعے کا سخت نوٹس لیتے ہوئے ذمہ داروں کے خلاف کارروائی کا حکم دے دیا۔
تفصیلات کے مطابق گرین ٹاؤن کے علاقہ میں 8سالہ عمر اپنے والد کے ہمراہ جا رہا تھا کہ اس کے گلے پر پتنگ کی ڈور پھر گئی جس کے باعث وہ زخمی ہو گیا۔
بچے کو فوری طبی امداد کے لئے جنرل ہسپتال منتقل کر دیا گیا ہے جہاں اس کی حالت خطرے سے باہر بتائی جا رہی ہے۔ وزیر اعلیٰ پنجاب محمد شہباز شریف نے واقعے کا سخت نوٹس لیتے ہوئے سی سی پی او لاہور سے رپورٹ طلب کر لی ہے۔
وزیر اعلیٰ پنجاب نے ذمہ داروں کے خلاف کارروائی کا حکم دیتے ہوئے حکام کو ہدایت کی ہے کہ زخمی بچے کو علام معالجے کی ہر ممکن سہولتیں فراہم کی جائیں۔ یاد رہے کہ چند روز قبل وزیر تعلیم پنجاب رانا مشہود احمد نے آئندہ سال فروری میں بسنت منانے کا اعلان کیا تھا۔
