اسلام آباد (این این آئی)پاکستان تحریک انصاف کے چیئر مین عمران خان نے کہا ہے کہ مسلم لیگ (ن )میری انکم اور ٹیکس کے حوالے سے جان بوجھ کر جھوٹے الزام لگا رہی ہے۔ٹوئٹر پر اپنے پیغام میں انہوں نے کہا کہ مسلم لیگ ن میری انکم اور ٹیکس پر پروپیگنڈا کر رہی ہے ،در حقیقت میں نے اپنی تمام انکم پر ٹیکس ادا کیا ہے جس میں زرعی انکم بھی شامل ہے ،اس حوالے سے تفصیلات ٹیکس ریٹرن میں درج ہیں ٗانہوں نے کہاکہ کچھ بھی چھپا ہوا نہیں ہے ،میں نے گزشتہ دو سالوں میں اپنی ذاتی بچت سے دو کروڑ روپے خرچ کیے جس کی تفصیلات پی ٹی آئی کے ویب سائٹ پر درج ہیں ۔ انہوں نے کہا کہ میرے تمام مالی معاملات شفاف ہیں اور لوگوں کو ان کی تفصیلات دستیاب ہیں ۔انہوں نے کہا کہ گزشتہ سال میں نے 4لاکھ77ہزار روپے زرعی آمدنی پر ٹیکس دیا اور 76ہزار دیگر انکم پر ٹیکس ادا کیا ،یہ سب ٹیکس ریٹرن میں درج ہے ،مسلم لیگ ن جان بوجھ کر جھوٹ بول رہی ہے ۔انہوں نے کہاکہ خیبر پختونخواہ حکومت نے سیاسی مداخلت کا خاتمہ کرکے اور میرٹ پر پیشہ ور مینجمنٹ کے ذریعے دکھا یا ہے کہ کس طرح عوامی اداروں کو نجکاری کے بغیر قابل عمل بناتے ہیں۔خیبر بنک نے پہلی مرتبہ اپنے شیئر ہولڈرز کو تین بلین روپے سے زائد کا حصہ دیا ۔