اسلام آباد (این این آئی)پاکستانی ڈراموں کی پشتو اور درّی زبان میں ڈبنگ کر کے انہیں افغانستان میں بھیجا جائے ،پاکستانی ڈرامے،پاک افغان تعلقات بہتر بنانے کیلئے اہم تجویز پر غور شروع،افغانستان میں پاکستان کے سفیرسید ابرار حسین نے پاکستان ٹیلی وژن کے چیئرمین عطا الحق قاسمی سے پی ٹی وی ہیڈکوارٹرز میں ملاقات کی۔ملاقات میں باہمی دلچسپی کے امور پر تبادلہ خیال کیا گیا۔سفیر نے بتایا کہ دونوں ہمسایہ ممالک کے مابین برادرانہ تعلقات کو مزید مضبوط بنانے کے لیے وسیع مواقع موجود ہیں۔زندگی کے مختلف شعبوں میں دونوں ممالک کا تعاون انتہائی اہمیت کا حامل ہے۔پاک افغان ادب و ثقافت میں بہت ساری قدریں مشترک ہیں۔یہی وجہ کہ دونوں ممالک ثقافتی ورثے کے تبادلے سے ایک دوسرے کے مزید قریب آ سکتے ہیں۔ پاکستان ٹیلی وژن اس سلسلے میں گراں قدر خدمات سرانجام دے سکتا ہے۔ پاکستانی ڈراموں کی پشتو اور درّی زبان میں ڈبنگ کر کے انہیں افغانستان میں بھیجا جائے تواس سے نہ صرف پاکستانی ثقافت کی تشہیر ہو گی بلکہ دونوں ممالک میں بسنے والے ایک دوسرے کے مزید قریب آجائیں گے۔یہ اقدام ان قوتوں کی حوصلہ شکنی میں بھی معاون ثابت ہو گا جو دو برادر ممالک کے درمیانی تعلقات خراب کرنا چاہتی ہیں۔پی ٹی وی کے چیئرمین عطا الحق قاسمی نے سفیر کی آمد پر ان کا شکریہ ادا کیا اور کہا کہ پاکستان ٹیلی ویژن ایک قومی چینل ہے اور اس کا کردار ہمیشہ ذمہ دارنہ رہا ہے۔افغانستان اور پاکستان کو ایک دوسرے کے مزید قریب لانے کے لیے آپ کی تجاویز انتہائی اہم ہیں۔اس سلسلے میں متعلقہ شعبہ سے بات چیت کر کے جتنی جلد ممکن ہو اس کو عملی شکل دی جائے گی۔