ریاض(مانیٹرنگ ڈیسک ) حج پروازوں کی آمد کے لیے جدہ کے کنگ عبد ا لعزیز انٹر نیشل ایئر پورٹ اور مدینہ منورہ کے پرنس محمد بن عبد العزیز ائع پورٹ پر تمام تیاریا ں مکمل کرلی گئیں۔عرب ٹی وی کے مطابق چار اگست سے شروع ہونے والاحج آپریشن5ستمبر تک جاری رہے گا اوردنیا کے مختلف ملکوں سے 14لاکھ سے زائدعازمین حجاز مقدس پہنچیں گے،عازمین حج کی آمد کے لیے ضروری انتظاما ت کی خاطر 27ممالک کی حکومتوں اور پرائیوٹ اداروں کا 7ہزار سے زائد افراد پر مشتمل عملہ مختلف امور سر انجام دے گا۔حج سے قبل ان ایئر پورٹوں کی تمام لاونجز کو حاجیوں کی آمد اور حج کے بعد روانگی کے لیے مختص کر دیا گیا ہے،حاجیوں کی اپنے اپنے ملکوں کو واپسی17ستمبر( 16ذوالحجہ) سے شروع ہو کر16اکتوبر( 15محرم) تک جاری رہے گی۔
جدہ ایئر پورٹ پر روزانہ 312پروازیں ا تریں گی جن کے ذریعے ہر روز 70ہزار سے زیادہ عازمین یہاں پہنچیں گے، حج ٹرمینل پر جہاز سے اترنے کے بعد سعودی وزارت صحت کا عملہ حاجیوں کو پولیو کے قطرے دوبارہ پلائے گا اور حفظان صحت کے بارے میں ان کی ضروری رہنمائی کرے گا۔بعد ازا ں حاجیوں کو امیگریشن کے تقاضے پورے کرنے کے لیے پاسپورٹ کنٹرول کی طرف روانہ کر دیا جائے گا،حاجی کسٹم کے مراحل سے گزر کر اپنا سامان وصول کریں گے اور پھر بسوں کے ذریعے مکہ مکرمہ روانہ وہ جائیں گے۔جدہ ایئر پورٹ کے حج ٹرمینل کا کھلا حصہ ایک لاکھ 60ہزار مربع میٹر پر پھیلا ہوا ہے جبکہ تعمیر شدہ جگہ کا رقبہ 90ہزار مربع میٹر ہے،یہاں اترنے والے کے پاسپورٹوں کی پڑتا ل کیلئے 142کاونٹر بنائے گئے ہیں ۔