انقرہ (این این آئی)ترکی کی سرکاری ایئرلائن ترکش ایئر لائن نے ناکام بغاوت کے بعد اپنے 100سے زائد ملازم برطرف کر دیئے ہیں۔ان ملازمین میں مینجمنٹ اور کیبن کریو کے ملازمین شامل ہیں۔ترک میڈیا کے مطابق ان ملازمین پر ناکام بغاوت کی حمایت کا الزام ہے۔ترک میڈیا کے مطابق ان ملازمین کو اتوار کی رات فارغ کیا گیا۔دوسری طرف ترکش ایئرلائن جو یورپ کی چوتھی بڑی کمپنی ہے کے ترجمان نے ان خبروں پر تبصرہ دینے سے انکار کیا۔دوسرے ذرائع کا کہنا ہے کہ یہ برطرفیاں کام میں نا اہلی کی وجہ سے کی گئی ہیں۔تھیلیرا ڈاٹ کام جو ایک فنانشل نیوز ویب سائٹ ہے کا کہنا ہے کہ برطرف ملازمین میں مینجمنٹ کے 100اور کریو کے250ملازمین شامل ہیں۔واضح رہے کہ ترکی میں ناکام بغاوت کے بعد سے اب تک ہزاروں فوجیوں، سپاہیوں ، اساتذہ اور دوسری سرکاری ملازمین کو برطرف کیا جا چکا ہے۔