واشنگٹن (اے پی پی) امریکا نے اسرائیلی حکومت کو اب تک کا سب سے بڑا فوجی پیکیج دینے کا اعلان کیا ہے ۔امریکا کی قومی سلامتی کی مشیر سوزن رائس نے واشنگٹن میں امریکی یہودیوں کی بین الاقوامی کمیٹی کے اجلاس سے خطاب کرتے ہوئے کہا کہ اسرائیل کے لئے امریکا کے نئے فوجی پیکیج کا حجم 37.5 ارب ڈالر اور 40ارب ڈالر ہے جو دس سال میں دیا جائے گا۔جس کے ذریعے وہ اپنی فضائیہ اور میزائل دفاعی سسٹم کو تقویت دے سکے گا ۔واضح رہے کہ امریکی حکومت نے اپریل میں سینیٹ کے دباؤ میں اس بات کا وعدہ کیا تھا کہ وہ اسرائیل کے لئے امریکی فوجی امداد کی تاریخ کا سب بڑا فوجی پیکیج دے گی۔امریکا اور اسرائیل نے 2018 ء میں ختم ہونے والے اپنے فوجی معاہدے کی مدت میں توسیع کے لئے بھی مذاکرات شروع کر دیئے ہیں ان دونوں حکومتوں کی کوشش ہے کہ اس معاہدے کی مدت آئندہ 10 برسوں کے لئے مزید بڑھا دی جائے۔بہت سے مبصرین امریکی حکومت کی طرف سے اسرائیلی حکومت کو دئے جانے والے اس فوجی پیکیج کو امریکا کے آئندہ صدارتی انتخابات کے تناظر میں دیکھ رہے ہیں۔