ریاض (اے پی پی) ہزاروں سال سے جاری آب زم زم کے تاریخی چشمے سے اب بھی ایک پورے شہر کی پانی کی ضرورت پوری کی جا رہی ہے اور چشمے سے فی گھنٹہ 68ہزار 4سو لٹر پانی مسلسل نکالا جا رہاہے یہ بات جیالوجیکل سروے کے صدر زہیرنواب نے سعودی اخبار کو انٹرویو میں بتائی۔ انہوں نے کہا کہ آب زم زم کے چشمے کی تاریخ کا آغاز ہزاروں سال قبل حضرت ابراہیم ؑ کی اہلیہ حضرت ہاجرہ اور ان کے بیٹے اسماعیل ؑ کی مکہ آمد کے ساتھ ہوتا ہے۔ اس چشمے نے مکہ کو ایک بے آب و گیاں ریگستانی علاقے میں ایک پھلتے پھولتے شہر میں تبدیل کر دیا جہاں دنیا بھر سے لاکھوں فرزندان توحید ہر سال حج و عمرہ کے لئے آتے ہیں اور اس چشمہ کے پانی سے سیراب ہوتے ہیں۔ جزیرہ نما عرب کے جنوبی حصوں سے اب بھی لوگ اگر آب زم زم سے بیرل کے بیرل بھر کر لے جاتے ہیں اور دوستوں اور رشتہ داروں کو تحفتاً پیش کرتے ہیں۔ مکہ میں مقیم کئی سعودی خاندان اب بھی رضاکارانہ طور پر زائرین کو آب زم زم پلانے کی خدمات سرانجام دیتے ہیں۔ زہیر نواب نے کہا کہ نہ صرف زائرین بلکہ سعودی عرب بھر میں آب زم زم کی طلب روز بروز بڑھ رہی ہے اور اس طلب کو پورا کرنے کے لئے ایک تحقیقی ادارے کا قیام عمل میں لایا گیا ہے، اس کے علاوہ ایک فیکٹری بھی قائم کی گئی ہے جو یومیہ 2لاکھ بوتل آب زم زم کو صاف کرتی ہے تا کہ زائرین کو بہترین معیار کا آب زم زم پینے کے لئے فراہم کیا جا سکے۔