ایتھنز (این این آئی)یونان نے افیون کی دوکروڑ ساٹھ لاکھ گولیاں لیبیا اسمگل کرنے کی کوشش ناکام بنادی ، حکام نے پکڑی گئی منشیات کی بھاری مقدار کے حوالے سے تحقیقات کا دائرہ وسیع کردیا ہے، یونانی حکام اس بات کا کھوج لگانے کی کوشش کررہے ہیں کہ آیا افیون کی 26 ملین گولیاں لیبیا اسمگل کرنے کی سازش میں شدت پسند گروپ دولت اسلامی ’داعش‘ کا ہاتھ ہے یا نہیں۔غیرملکی خبررساں ادارے کے مطابق یونانی حکام نے امریکی انسداد منشیات فورس کے تعاون سے منشیات کی 26 ملین گولیاں پکڑنے کا دعویٰ کیاہے مبینہ طور پر یہ منشیات لیبیا کو اسگل کرنے کی کوشش کی جا رہی تھی۔ ذرائع کا کہنا تھا کہ لیبیا کو بھجوائی جانے والی منشیات کی گولیاں ’ٹراماڈول‘ نامی مادے سے تیار کردہ ہیں جو عموما طبی مقاصد کے لیے استعمال کی جاتی ہیں۔ذرائع ابلاغ کے مطابق حال 10 مئی کو بھارتی دارالحکومت نئی دہلی سے ایک مال بردار ٹرک یونان کی پرانی اور سب سے بڑی بندرگاہ بیریوس پہنچا، جہاں امریکی انسداد منشیات حکام کی نشاندہی پر اسے پکڑ لیا گیا تھا۔ یونانی پولیس کے ایک عہدیدار لوکاس ڈانابایسس نے بتایا کہ منشیات سے لدے ٹرک کو پکڑنے میں امریکی اداروں کی جانب سے معلومات فراہم کی گئی تھیں۔گولیوں کی شکل میں منشیات ٹرک پر گھروں میں استعمال ہونے والے فرنشنگ بکسوں کے پیچھے ٹھونسی گئی تھیں اور کہا گیا تھا یہ سامان لیبیا لے جایا جا رہا ہے۔یونانی حکام اس بات کی چھان بین کررہے ہیں کہ آیا لیبیا کو بھاری مقدار میں منشیات اسمگل کرنے میں شدت پسند تنظیم دولت اسلامی ’’داعش‘‘ کا ہاتھ ہے یا نہیں۔ کیونکہ جن کمپنیوں کی جانب سے یہ سامان منگوایا گیا ہے ان کے بارے میں شبہ ہے وہ دہشت گردوں کے ساتھ رابطوں میں ہیں اور تعاون کرتی ہیں۔ منشیات کی متذکرہ بالا مقدار کی قیمت 13 ملین ڈالر لگائی گئی ہے