سوشل ویب سائٹس پر دی گئی پروفائل پکچر اور دیگر تصاویر پر جب لائکس اور تعریفی کمنٹس آتے ہیں تو ہمیں بہت خوشی ہوتی ہے، لیکن یہ خطرہ ہر وقت درپیش رہتا ہے کہ یہ تصویر ’’چوری‘‘ کرکے کسی خاص مقصد یا منفی سرگرمی کے لیے استعمال کی جاسکتی ہے۔ مگر اب فیس بک کی حد تک اس مسئلے کا حل نکل آیا ہے۔

یہ حل ایک ایسی ایپلی کیشن ہے جس کے استعمال کے بعد غیرمتعلقہ لوگ فیس بک پر آپ کی دی گئی تصاویر دیکھتے ہوئے بھی نہیں دیکھ پاتے، کیوں کہ یہ آپ کو تصویر کی چوری سے بچانے کے لیے بنائی جانے والی یہ ایپلی کیشن غیرمتعلقہ لوگوں کو آپ کی تصویر کی جگہ بلیوں کی تصاویر دکھاتی ہے۔

اس دل چسپ ایپلی کشن کا نام ہے Wickr۔ اس ایپلی کیشن کو انسٹال کرنے کے بعد آپ اس کے وکرٹائمڈ فیڈ (WTF) فیچر کے ذریعے تصاویر شیئر کرسکتے ہیں۔ ایپ انسٹال کرنے کے بعد اس کے WTF ٹیب پر کلک کریں اور نئی تصویر بنائیں یا پہلے سے موجود تصویر کو منتخب کریں۔ اب آپ ان زیادہ سے زیادہ 151 لوگوں کا انتخاب کرسکتے ہیں جن کو آپ کی تصویر نظر آسکے گی۔

ان افراد کے لیے یہ تصویر ان کی وکرفیڈ میں اگلے 24 گھنٹے کے دوران دست یاب رہے گی اور پھر خودکار طریقے سے ختم ہوجائے گی، جب کہ باقی لوگوں کو صرف بلیوں کی تصاویر نظر آئیں گی۔ تصویر شیئر کرنے پر سب ہی کو بلیوں کی تصاویر بھیجی جائیں گی مگر جن لوگوں کو آپ نے اجازت دی ہوگی وہ بلی کی تصویر پر کلک کرکے آپ کی تصویر دیکھ سکیں گے۔ وکر کے ذریعے محفوظ بنائی گئی تصاویر کو فیس بک کے سرور بھی نہیں دیکھ سکتے۔