اسلام آباد (نیوز ڈیسک)پاکستان پیپلزپارٹی نے آزاد کشمیر میں مسلم لیگ (ن) کی جانب سے حکومت بنانے کے اقدام کو چیلنج کرنے کے لیے قانونی کارروائی کی تیاری مکمل کرلی ہے۔
پارٹی کی قانونی ٹیم نے اس حوالے سے درخواست تیار کرلی ہے جس کی قیادت سے منظوری بھی حاصل کرلی گئی ہے۔پیپلزپارٹی کے ذرائع کے مطابق حکومت سازی کے خلاف تیار کردہ پٹیشن آئندہ 48 گھنٹوں کے دوران ہائی کورٹ میں دائر کیے جانے کا امکان ہے۔ درخواست میں عدالت سے مسلم لیگ (ن) کو حکومت تشکیل دینے سے روکنے کے لیے حکمِ امتناع جاری کرنے کی استدعا کی جائے گی۔ذرائع کا کہنا ہے کہ پیپلزپارٹی اپنی درخواست میں آزاد کشمیر اسمبلی کی نشستیں مکمل ہونے تک حکومت سازی کا عمل روکنے اور پونچھ ڈویژن کے باقی دو اضلاع میں انتخابات کرانے کا مطالبہ بھی کرے گی۔
پیپلزپارٹی کے مؤقف کے مطابق پونچھ ڈویژن کے دو اضلاع میں انتخابات نہ ہونے کی وجہ سے آزاد کشمیر اسمبلی مکمل نہیں ہوئی، اس لیے موجودہ صورتحال میں حکومت کی تشکیل کو آئینی طور پر چیلنج کیا جا سکتا ہے۔واضح رہے کہ چند روز قبل پیپلزپارٹی آزاد کشمیر کی پارلیمانی پارٹی کا اجلاس فریال تالپور کی صدارت میں زرداری ہاؤس میں ہوا تھا۔ اجلاس میں آزاد کشمیر میں مسلم لیگ (ن) کی حکومت سازی کی مخالفت کرنے اور اس معاملے پر قانونی راستہ اختیار کرنے کا فیصلہ کیا گیا تھا۔
