اسلام آباد (نیوز ڈیسک) سعودی عرب نے دارالحکومت ریاض میں ملکی و غیر ملکی شہریوں کیلئے بڑی سہولت کا اعلان کر دیا۔
سعودی حکومت نے رہائشی اور تجارتی عمارتوں کے کرایے آئندہ پانچ سال تک نہ بڑھانے کا فیصلہ کیا ہے۔ اس اقدام سے شہریوں کے معاشی مسائل میں کمی ہو گی۔
مملکت سعودی عرب میں جائیداد کی قیمتوں اور کرایے میں تیزی سے اضافہ ہو رہا ہے جس سے عام شہریوں کے لئے رہائش حاصل کرنا دشوار ہوتا جا رہا ہے۔
سعودی وزارت ہاؤسنگ کا کہنا ہے کہ اس فیصلے کا مقصد دارالحکومت ریاض کو مزید قابل رہائش شہر بنانا اور شہریوں پر مالی دباؤ کو کم کرنا ہے۔حکومت کرایوں کی حد مقرر کر کے متوسط اور کم آمدنی والے طبقے کو ریلیف دینا چاہتی ہے۔
اس فیصلے کے تحت تمام نئے اور موجودہ کرایہ داری معاہدے 5 سال تک ایک ہی کرایے پر برقرار رہیں گے اور مالکان اس دوران کرایہ نہیں بڑھا سکیں گے۔
اقتصادی ماہرین نے اس اقدام کو سعودی عرب کے وژن 2030 کے تحت ریاض کو عالمی سطح پر ایک جدید کاروباری اور رہائشی مرکز بنانے اور کرایہ کنٹرول کو اس منصوبے کی ایک اہم کڑی قرار دیاہے۔
