اسلام آبان (نیو ز ڈ یسک( وفاقی حکومت نے نوجوانوں کے لیے ایک اہم قدم اٹھاتے ہوئے نیشنل ووکیشنل اینڈ ٹیکنیکل ٹریننگ کمیشن (NAVTTC) کے تحت نیا پروگرام شروع کر دیا ہے، جس کا مقصد ہنرمندی کے ذریعے روزگار کے مواقع فراہم کرنا ہے۔ یہ منصوبہ پاکستان گلوز مینو فیکچررز اینڈ ایکسپورٹرز ایسوسی ایشن کے تعاون سے شروع کیا گیا ہے۔اس پروگرام کو وزیراعظم یوتھ پروگرام (PMYP) اور اسپیشل انویسٹمنٹ فیسیلیٹیشن کونسل (SIFC) کی مشاورت سے ترتیب دیا گیا ہے تاکہ نوجوانوں کو ملکی و عالمی منڈی میں درکار جدید مہارتوں کی تربیت دی جا سکے۔

حکام کے مطابق ان کورسز میں انڈسٹری کے ماہر انسٹرکٹرز براہِ راست تربیت فراہم کریں گے۔ متعارف کرائے گئے کورسز میں CAD/CAM، کمپیوٹرائزڈ گلوز پیٹرن میکنگ، لیدر گلوز پیٹرن میکنگ اور لیدر گلوز اسٹچنگ شامل ہیں۔ یہ تمام کورسز چھ ماہ کے ہوں گے اور امیدواروں کو مفت فراہم کیے جائیں گے۔مزید بتایا گیا ہے کہ تربیت مکمل کرنے کے بعد نوجوان نہ صرف پاکستان بلکہ بیرونِ ملک بھی بہتر روزگار کے مواقع حاصل کر سکیں گے۔ اس مقصد کے لیے مقامی صنعت سے براہِ راست روابط قائم کیے گئے ہیں تاکہ تربیت پانے والے افراد کو فوری روزگار میسر آ سکے۔پروگرام میں شمولیت کے لیے کم از کم تعلیمی قابلیت مڈل یا میٹرک جبکہ عمر کی حد 16 سے 40 سال رکھی گئی ہے۔

امیدوار اپنی درخواستیں 25 ستمبر 2025 تک آن لائن جمع کرا سکتے ہیں، جبکہ کلاسز کا آغاز یکم اکتوبر سے ہوگا۔ماہرین کے مطابق یہ اقدام نوجوانوں کے لیے ایک سنہری موقع ہے جو نہ صرف انہیں ہنر مند بنا کر معاشی طور پر مستحکم کرے گا بلکہ ملک کے لیے قیمتی زرمبادلہ کمانے میں بھی مددگار ثابت ہوگا۔