اسلام آباد (نیوز ڈیسک)پاکستان ٹیلی کمیونیکیشن اتھارٹی (پی ٹی اے) نے ملک بھر میں جوئے اور آن لائن سٹے بازی کو فروغ دینے والے پلیٹ فارمز کے خلاف کارروائی کرتے ہوئے 184 ویب سائٹس اور موبائل ایپلیکیشنز کو بلاک کر دیا ہے۔قومی اسمبلی کے حالیہ اجلاس میں کابینہ ڈویژن کی طرف سے پیش کیے گئے ایک تحریری بیان میں بتایا گیا کہ انٹرنیٹ پر غیر قانونی سرگرمیوں کی روک تھام کے سلسلے میں پی ٹی اے نے بڑی تعداد میں ایسے پلیٹ فارمز تک رسائی کو بند کیا ہے جو آن لائن جوا یا بیٹنگ فراہم کر رہے تھے۔

تحریری جواب میں یہ بھی واضح کیا گیا کہ پی ٹی اے صرف ڈیجیٹل پلیٹ فارمز کو بلاک کرنے کا مجاز ہے، تاہم ان جرائم میں ملوث افراد کے خلاف قانونی کارروائی کرنا اس کے دائرہ اختیار سے باہر ہے۔اے آر وائی نیوز کے مطابق، سرکاری جواب میں یہ بھی بتایا گیا کہ تمام حکومتی اداروں کو ہدایت دی گئی ہے کہ وہ کسی بھی ایسی کمپنی یا آن لائن سروس کے ساتھ کوئی معاہدہ نہ کریں جو شرط لگانے یا جوئے کی سرگرمیوں میں ملوث ہو۔کابینہ ڈویژن نے اعتراف کیا کہ آن لائن غیر قانونی مواد کے مکمل خاتمے کے لیے پی ٹی اے کو درکار قانونی اختیارات محدود ہیں، اور مؤثر نتائج حاصل کرنے کے لیے قانون سازی کے ساتھ ساتھ متعلقہ اداروں کے درمیان بہتر ہم آہنگی ناگزیر ہے۔