اسلام آباد (نیوز ڈیسک)پاکستان کے طلباء، اساتذہ، سرکاری و نجی شعبے سے وابستہ افراد کے لیے اگست کے مہینے میں ایک خوشگوار وقفہ متوقع ہے، کیونکہ اس بار یومِ آزادی اور چہلم امام حسینؓ قریبی ایام میں آنے والے ہیں، جس سے 14 اگست سے 17 اگست تک مسلسل چار دن کی چھٹیاں ممکن ہو سکتی ہیں۔
14 اگست – آزادی کا دن
ہر سال کی طرح اس مرتبہ بھی 14 اگست کو یومِ آزادی کا جشن ملک بھر میں روایتی جوش و خروش سے منایا جائے گا۔ اس موقع پر پرچم کشائی کی تقاریب، حب الوطنی سے بھرپور نغمے، ثقافتی سرگرمیاں اور تحریکِ پاکستان کے مشاہیر کو خراج تحسین پیش کرنے کے لیے مختلف تقریبات کا انعقاد کیا جائے گا۔
15 اگست – چہلم امام حسینؓ
یوم آزادی کے اگلے دن، یعنی 15 اگست کو حضرت امام حسینؓ اور ان کے رفقا کی عظیم قربانی کی یاد میں چہلم عقیدت و احترام سے منایا جائے گا۔ ملک بھر میں مجالس، جلوس اور دیگر مذہبی پروگرام منعقد کیے جائیں گے جن میں شہدائے کربلا کو خراج عقیدت پیش کیا جائے گا۔
16 اور 17 اگست – ہفتہ و اتوار کی معمول کی تعطیلات
اگر چہلم اور یومِ آزادی کی چھٹیوں کا اعلان ہو جاتا ہے تو ان کے فوراً بعد ہفتہ (16 اگست) اور اتوار (17 اگست) کی عمومی تعطیلات آ جائیں گی، جس سے لوگوں کو چار دن کے متواتر آرام کا موقع ملے گا۔ یہ مختصر وقفہ طلبہ و طالبات کے لیے سکون اور ملازمین کے لیے تازگی کا ذریعہ بن سکتا ہے۔
سیکیورٹی پلان کی تیاری، مگر نوٹیفکیشن کا انتظار
حکام کو ہدایت دی گئی ہے کہ ان دنوں میں امن و امان کی صورتحال کو یقینی بنانے کے لیے سیکیورٹی کے سخت انتظامات کیے جائیں۔ خاص طور پر یومِ آزادی کی تقریبات اور چہلم کے جلوسوں کے موقع پر فول پروف انتظامات متوقع ہیں۔
تاہم 14 اور 15 اگست کی تعطیلات کا سرکاری اعلان تاحال سامنے نہیں آیا، لیکن قوی امکان ہے کہ جلد ہی متعلقہ نوٹیفکیشن جاری کر دیا جائے گا۔
