اسلام آباد(این این آئی)وزارت نیشنل فوڈ سیکیورٹی اینڈ ریسرچ اور شوگر ملز مالکان نے چینی کی قیمتوں پر فریق ثالث کے ذریعے آڈٹ پر اتفاق کرتے ہوئے عید الضحیٰ تک قیمتوں میں عارضی کمی کا فیصلہ کرلیا۔تفصیلات کے مطابق وفاقی وزیر برائے قومی غذائی تحفظ و تحقیق رانا تنویر حسین کی زیرصدارت چینی کی قیمتوں اور فراہمی سے متعلق ایک اہم اجلاس منعقد ہوا جس میں شوگر ملز مالکان اور دیگر متعلقہ فریقین نے شرکت کی۔وزارت کی جانب سے جاری کردہ اعلامیہ کے مطابق اجلاس میں فیصلہ کیا گیا کہ پیداوار کی لاگت میں شفافیت کو یقینی بنانے کے لیے وزارت اور مل مالکان باہمی رضامندی سے ایک فریق ثالث آڈٹ فرم کی خدمات حاصل کریں گے۔
اعلامیہ میں کہا گیا کہ یہ اقدام مستقبل میں چینی کی قیمتوں کے تعین کو شفاف، منصفانہ اور اعداد و شمار کی بنیاد پر بنانے کیلئے کیا جا رہا ہے۔اجلاس میں طے پایا کہ آڈٹ کی رپورٹ اور باہمی مشاورت کی روشنی میں عید کے بعد چینی کی نئی قیمت کا تعین کیا جائے گا۔اعلامیہ کے مطابق حکومت کا شفاف قیمتوں کے تعین کیلئے بڑا اقدام ہے، عوام کو ریلیف دینے کیلئے شوگر ملز نے مثبت ردعمل دیا جبکہ چینی کی قیمتوں پر حکومتی کنٹرول کیلئے مضبوط اقدامات جاری ہیں۔اعلامیہ میں کہا گیا کہ مصنوعی مہنگائی کے سدباب کیلئے وزارت متحرک ہے، عوامی مفاد کیلئے حکومت اور صنعت کاروں میں مشاورت جاری ہے۔وفاقی وزیر نے شوگر ملز کی جانب سے عیدالاضحی تک چینی کی ایکس مل قیمت میں عارضی کمی کے اعلان کو سراہا اور اسے صارفین کو فوری ریلیف دینے کی مثبت کاوش قرار دیا۔
رانا تنویر حسین نے حکومت کے اس عزم کو دہرایا کہ شفافیت، منصفانہ قیمتوں اور عوامی تحفظ کو یقینی بنانے کیلئے اقدامات جاری رکھے جائیں گے۔انہوں نے کہاکہ پبلک اور پرائیویٹ سیکٹر کے درمیان مسلسل مشاورت اور ہم آہنگی ضروری ہے تاکہ غذائی تحفظ کو برقرار رکھا جا سکے اور مصنوعی مہنگائی کا سدباب کیا جا سکے۔راناتنویرحسین نے کہاکہ وزارت تمام ضروری اشیائے خورونوش کی قیمتوں کے استحکام کیلئے فعال پالیسی سازی، اسٹیک ہولڈرز سے رابطے اور منڈی کی نگرانی کے عمل کو جاری رکھے گی۔
