مالی(نیوزڈیسک) مالدیپ کے صدر عبداللہ یامین نے ہندوستانی وزیر خارجہ سشما سوراج کو خبردار کیا ہے کہ بھارت ہمارے اندرونی معاملات میں مداخلت سے باز رہے، بھارتی وزیر خارجہ 2روزہ دورئہ مالدیپ کےموقع پر صدر یامین نے سشما سوراج کو واضح طور پر بتایا کہ تمام ممالک کو مالدیپ کی خودمختاری کا احترام کرنا چاہیے، صدارتی دفتر کی جانب سے جاری اعلامیہ میں مالدیپ کے رہنما نے کہا کہ ان کی حکومت اپنے اندرونی معاملات میں کسی غیر ملکی پارٹی کی مداخلت برداشت نہیں کرے گی، مالدیپ کی سالمیت اور خودمختاری کا احترام تمام ممالک کو کرنا ہوگا۔خیال رہے کہ دہشت گردی کے الزامات پر مالدیپ کے سابق صدر محمد نشید کو 13 سال قید کی سزا سنائی گئی تھی جس کی دنیا کے متعدد ممالک نے مذمت کی ہے۔اقوام متحدہ کے ایک پینل نے گزشتہ ماہ نشید کی سزا کو غیر قانونی قرار دیتے ہوئے ان کی فوری رہائی کا مطالبہ کیا تھا۔ –