اسلام آباد(این این آئی)پولیس کانسٹیبل عبدالحمید شاہ کے بیٹوں نے پی ٹی آئی رہنما عمر ایوب کے بیان کی تردیدکرتے ہوئے کہاہے کہ ہمارے والد کو 4اکتوبرکو پی ٹی آئی کے جلسے میں شہیدکیاگیاہے،سی ٹی اسکین رپورٹ کے مطابق والد کے سر پر چوٹ اور سینے پر زخموں کے نشانات تھے۔

تفصیلات کے مطابق پولیس کانسٹیبل عبدالحمید شاہ کی شہادت کے بیٹوں کی طرف سے پی ٹی آئی رہنما عمر ایوب کے بیان کی تردید منظر عام پہ آگئی۔4اکتوبر کو پی ٹی آئی کے احتجاج کے دوران شدید زخمی ہونے کے باعث پولیس کانسٹیبل عبدالحمید شاہ کی شہادت ہوئی۔گزشتہ روز عمر ایوب نے ٹی وی پروگرام میں غلط بیان دیتے ہوئے کہاکہ شہید کانسٹیبل کی ڈیتھ بلڈ پریشر اورہارٹ اٹیک سے ہوئی، عمر ایوب نے اس ضمن میں شہید پولیس کانسٹیبل کے بیٹوں کے بیان کا حوالہ بھی دیاتاہم کانسٹیبل کے بیٹوں کے ویڈیو بیانات اور تردید منظر عام پہ آگئی۔

بیٹے نعمان عبد الحمید شاہ نے کہاکہ میرے والد کی میڈیکل رپورٹ کے مطابق ان کے سر اور جسم کے دیگر حصوں پر شدید زخموں کے نشانات پائے گئے میں وزیراعظم پاکستان، آئی جی اسلام آباد اور آرمی چیف سے گزارش کرتا ہوں کہ ہمیں انصاف فراہم کیا جائے اور ان کے قاتلوں کو سخت سزا دی جائے۔دوسرے بیٹے حماد حمید شاہ کے مطابق میرے والد 4اکتوبر 2024کو پی ٹی آئی کے جلسے میں شہید کیے گئے،سی ٹی اسکین رپورٹ کے مطابق میرے والد کے سر پر چوٹ اور سینے پر زخموں کے نشانات تھے۔