سرینگر(اے این این)مقبوضہ جموں کشمیر سے متعلق کشمیر کی ایک انسانی حقوق کی ایک تحقیقاتی رپورٹ کے مطابق مقبوضہ جموں کشمیر میں بھارتی فوجیوں نے ریاستی دہشتگردی کی جاری کارروائیوں میں جنوری 1989ءسے اب تک 95136بے گناہ کشمیریوں کو شہید کیاہے جن میں 7245کو دوران حراست شہید کیاگیا ۔ ان واقعات سے 22,788خواتین بیوہ ،107,800بچے یتیم ، 10,229،خواتین کی بے حرمتی،8ہزار سے زائد افراد کو حراست کے دوران لاپتہ ،106,025عمارتوں کو تباہ ،ہزاروں نوجوانوں کو گرفتار جبکہ کالے قانون پبلک سیفٹی ایکٹ کے تحت سینکڑوں کشمیریوں کو مختلف جیلوں میں قید کردیاگیا ۔مقبوضہ جموں کشمیر میں تعینات بھارتی قابض فوج راشٹریہ رائفلز نے ہفتہ کو معصوم کشمیریوں کے قتل عام کے اعداد و شمار جاری کرتے ہوئے کہاہے کہ گزشتہ 25سالوں کے دوران 8522کشمیریوں کو شہید کیاگیا ۔کشمیرمیڈیا رپورٹس کے مطابق راشٹریہ رائفلز کے اکتوبر 1990ءمیں مقبوضہ جموں کشمیر میں داخل ہونے کے 25سال مکمل کرنے کے بعد بھارتی قابض فوج کی شمالی کمان کے ترجمان کرنل ایس ڈی گھوسوامی نے میڈیا کو اپنے ایک انٹرویو میں بتایاکہ راشٹریہ رائفلز نے جموں کشمیر میں 25سالوں کے دوران 8522کشمیریوں کو شہید کیا ۔انہوںنے بتایاکہ اس وقت کے بھارتی آرمی چیف جنرل وی این شرما نے کشمیریوں کی تحریک کو کچلنے کیلئے آر آر کو یکم اکتوبر 1990ءکو مقبوضہ جموں کشمیر میں بھیجااور اس کی تجویز اس وقت کے لیفٹیننٹ جنرل بی سی جوشی نے دی تھی ۔اس وقت مقبوضہ جموں کشمیر میں آر آر کی صرف تین یونٹس تھیں اب 60یونٹس ہیں ۔ذرائع کے مطابق مقبوضہ جموں کشمیر میں تحریک آزادی کے شروع ہونے کے وقت بھارتی حکومت نے 85آرمی بٹالین اپنے ناجائز قبضے کو دوام بخشنے کیلئے بھیجی تھیں جن کی تعداد اب 100سے تجاوز کرچکی ہے ۔گھوسوامی نے کہاکہ جموں کشمیر میں 15ویں اور 16ویں کور میں رراشٹریہ رائفلز کے ہیڈ کوارٹر ڈیلٹا ، رومیو ،یونیفارم ہیں اسی طرح آر آر کومقبوضہ جموں کشمیر کے 12اضلاع کے حساب سے 12سیکٹرز میں تقسیم کیاگیا ہے ۔