پشاور(این این آئی) ضلع باجوڑ میں جے یو آئی کے ورکرز کنونشن میں ہونے والے دھماکے میں 7بہنوں کا اکلوتا بھائی بھی جاں بحق ہوگیا۔ ضلع باجوڑ کی تحصیل خار کے علاقہ شنڈئی موڑ توحید آباد سے تعلق رکھنے والیجاں بحق 12سالہ ابو زر کے والد جاوید کے مطابق ان کا بیٹا ساتویں جماعت کا طالب علم تھا اور سکول کی چھٹیوں اور فارغ اوقات میں چپس فروخت کرتا تھا تاکہ گھر کی معاشی مشکلات دور کرنے میں مدد کر سکے۔ ابو زر کے والد نے بتایا کہ اس کا کسی سیاسی جماعت سے کوئی تعلق نہیں تھا۔
محکمہ صحت کی رپورٹ کے مطابق اتوار کو ہونے والے خودکش دھماکے میں جاں بحق ہونے والوں میں 8 بچے بھی شامل ہیں جبکہ زخمیوں میں بھی بچے شامل ہیں۔ یاد رہے کہ اس دھماکے میں اب تک 55 افراد جاں بحق اور 78 سے زیادہ زخمی ہوئے ہیں۔محکمہ صحت کی رپورٹ کے مطابق واقعہ میں جاں بحق ہونے والے 6 بچوں کی شناخت ہونے کے بعد نعشیں لواحقین کے حوالے کردی گئی ہیں جبکہ 2 بچوں کی شناخت تاحال نہیں ہوئی۔دوسری جانب چائلڈ پروٹیکشن ڈیپارٹمنٹ باجوڑ کی ٹیم نے ڈسٹرکٹ آفیسر چائلڈ پروٹیکشن برہان الدین سلارزئی کے سربراہی میں ہیڈکوارٹرز ہسپتال خار کا دورہ کیا اور سرجیکل وارڈ میں 6 بچوں کی عیادت کی۔
انہوں نے حکام کو ہدایت کی کہ بچوں کی صحت کا خاص خیال رکھا جائے۔چائلڈ پروٹیکشن ٹیم نے مردہ خانے کا بھی دورہ کیا اور مردہ خانے میں موجود 2 بچوں کی شناخت کے لیے کوششیں تیز کردیں تاکہ 2 ناقابل شناخت بچوں کی شناخت کے بعد ان کی نعشیں بھی لواحقین کے حوالے کی جاسکیں۔
