اسلام آباد(این این آئی)پاکستان سمیت دنیا کے مختلف ملکوں میں ایئر لائنز کے فنڈز روکنے کے معاملے پر انٹرنیشنل ایئر ٹرانسپورٹ ایسوسی ایشن (ایاٹا)نے فنڈز رکنے سے متعلق رپورٹ جاری کر دی۔پاکستان میں ایئر لائنز کے 188ملین ڈالرز کے فنڈز رکے ہوئے ہیں۔ایاٹا کے مطابق نائجیریا میں ایئر لائنز کے 812ملین ڈالر، بنگلادیش میں214ملین ڈالر، الجیریا میں196ملین ڈالر، لبنان میں 141ملین ڈالر پھنسے ہوئے ہیں۔
ایاٹا کے مطابق فنڈز رکنے کی وجہ سے ایئر لائنز کیلئے مشکلات میں اضافہ ہوا ہے۔ایاٹا نے کہاکہ طویل وقت کیلئے فنڈز رکے رہنا ایئر لائنز کے بزنس کیلئے خطرہ ہے۔ انٹرنیشنل ایئر ٹرانسپورٹ ایسوسی ایشن کے مطابق ایئر لائنز انڈسٹری کے دنیا بھر میں بلاک شدہ فنڈز اپریل 2023میں47 فیصد اضافے سے2.27بلین ڈالر ہوگئے ہیں۔ ایاٹا کے مطابق اپریل 2022میں بلاک شدہ فنڈز 1.55بلین ڈالر تھے، پاکستان سمیت جن ممالک میں فنڈز پھنسے ہیں وہاں ایئرلائنز کا فلائٹ آپریشن جاری رکھنا مشکل ہوگا۔ ایاٹا نے کہا کہ تمام حکومتوں کو اس صورتحال کے حل کیلئے صنعت کے ساتھ مل کر کام کرنے کی ضرورت ہے،بروقت فنڈز ملنے سے ایئر لائنز اپنی سروسز جاری رکھ سکیں گی۔
