ریاض(این این آئی)امور حرمین شریفین” کے ادارہ کے سربراہ شیخ ڈاکٹر عبدالرحمن السدیس نے بتایا ہے کہ رمضان کریم کے پہلے دو عشروں کے دوران مسجد نبوی صلی اللہ علیہ وسلم تشریف لانے والے مرد و خواتین نمازیوں اور زائرین کی تعداد 21 ملین تک پہنچ گئی ہے۔

عرب ٹی وی کے مطابق رمضان المبارک 1444 میں پچھلے سال کے اسی عرصے کے مقابلے میں 49 فیصد اضافہ ہوا ہے۔ سال 1444 کے محرم الحرام کے مہینے کے آغاز سے اب تک مسجد نبوی میں آنے والے نمازیوں کی کل تعداد 169 ملین سے زیادہ ہوگئی ہے۔شیخ سدیس نے زور دے کر کہا کہ مسجد نبوی کے امور کا انتظام کرنے والی ایجنسی نے اپنے آپریشنل پلان کے ذریعے مسجد نبوی کو تیار کیا ہے۔ ہر وہ چیز فراہم کی ہے جس سے نمازیوں اور زائرین کو سکون ملے۔ ایسی سہولیات فراہم کی گئی ہیں جس سے آنے والوں کو عبادات کی ادائیگی میں آسانی اور سہولت فراہم کی جا سکے۔شیخ السدیس نے اس حوالے سے خادم حرمین شریفین شاہ سلمان اور ولی عہد شہزادہ محمد بن سلمان کا خصوصی شکریہ ادا کیا جن کی توجہ کے باعث ضیوف الرحمن کے لیے بہترین حالات پیدا کرنے کے مواقع میسر آ رہے ہیں۔