لاہور( این این آئی)قومی ٹیم کے کپتان بابر اعظم نے کہا ہے کہ ایک بار پھر لاہور میں پاکستان کی کٹ میں کھیلنا اچھا احساس ہے، ٹیم میں نئے ٹیلنٹ کے ساتھ سینئر زکھلاڑی بھی ہیں، نیوزی لینڈ کے خلاف سیریز دلچسپ ہو گی،چیئرمین پاکستان کرکٹ بورڈ کی مینجمنٹ کمیٹی نے مجھے اعتماد دیا ہے، اب میرا فوکس کپتانی سے ہٹ کر ہے۔

قذافی اسٹیڈیم لاہور میں پریس کانفرنس کرتے ہوئے بابر اعظم نے کہا کہ سیریز ٹو سیریز ہم کوشش کرتے ہیں کہ اچھے سے اچھا کریں۔ کوئی لکھوا کر تو نہیں آتا کہ اس نے ہی کپتانی کرنا ہے۔ہمیں پرفارمنس پر فوکس کرنا ہے اس لیے میں ایسی چیزوں کو نظر انداز کرتا ہوں اور یہی بہتر ہے۔بابر اعظم نے کہا کہ مجھے کپتانی کی ٹینشن نہیں کہ کیا باتیں ہو رہی ہیں، افواہوں کا مجھے علم نہیں، میں کوشش کرتا ہوں نظرانداز کروں۔کوشش ہوتی ہے کہ کھلاڑیوں سے پرفارمنس لوں، خود بھی اچھا کھیلوں۔قومی ٹیم کے کپتان نے کہا کہ کافی عرصے کے بعد لاہور میں انٹرنیشنل کرکٹ ہو رہی ہے، سب کھلاڑی پرجوش ہیں فینز کو بھی انتظار ہے۔سب نے بھرپور تیاری کی ہے، میگا ایونٹ سے پہلے سیریز بڑی اہم ہے ،تمام کھلاڑی مکمل فٹ اور ردھم میں ہیں، اچھی کرکٹ کھیلنے کی کوشش کریں گے۔بابر اعظم نے کہا کہ ہماری بیٹنگ اور بولنگ لائن اپ اچھی ہے۔ حارث، شاہین اور نسیم کا اچھا کمبی نیشن بنا ہوا ہے۔حریف ٹیم سے متعلق انہوں نے کہا کہ نیوزی لینڈ کا کمبی نیشن بھی اچھا ہے، منجھے ہوئے کھلاڑی ہیں، کسی کو آسان نہیں لیتے، لوگ کہہ رہے ہیں کہ بی ٹیم ہے۔پچز سے متعلق بات کرتے ہوئے قومی ٹیم کے کپتان بابر اعظم نے کہا کہ پچز کا معیار اچھا ہوتا جا رہا ہے، وکٹ اچھی لگ رہی ہے۔ انہوں نے مزید کہا کہ یہاں 180، 190 ہوسکتے ہیں، 200 بھی ہوسکتے ہیں۔ بابر اعظم نے کہا کہ ایشیا ء کپ سے قبل کم وقت ہے، یہ میچز ہماری تیاری کا حصہ ہیں،

بہتریں الیون کھلائیں گے اور بہترین ٹیم کے ساتھ جائیں گے۔بیٹنگ آرڈر سے متعلق سوال کے جواب میں بابر اعظم نے کہا کہ ہمارا اب تجربہ کرنے کا ارادہ نہیں، میں اور رضوان ہی اوپن کریں گے۔ان کا کہنا تھا کہ باقی دیکھیں گے جو کمبی نیشن میں فٹ ہوگا اس کو کھلائیں گے۔ آج پریکٹس کے بعد فائنل الیون کا اعلان کردیں گے۔ انہوں نے کہا کہ احسان اللہ اور زمان کے آنے سے بولنگ اور مضبوط ہوگئی ہے، ہماری کوشش ہو گی کہ بینچ اسٹرنتھ کو بھی موقع دیں۔

حارث اور شان نمبر چار پر کھیلے ہوئے ہیں، صائم ایوب بھی اپنی گیم کھیلتا ہے ہم دیکھیں گے کون کہاں سیٹ ہو سکتا ہے۔قومی ٹیم کے کپتان بابر اعظم نے کہا کہ ایک بار پھر لاہور میں پاکستان کی کٹ میں کھیلنا اچھا احساس ہے۔ ٹیم میں نئے ٹیلنٹ کے ساتھ سینئر کھلاڑی بھی ہیں، سیریز دلچسپ ہوگی۔انہوں نے کہا کہ ٹی ٹونٹی ورلڈکپ میں ایک سال رہ گیا، سیریز میں دیکھیں گے کہ کہاں کھڑے ہیں۔انہوں نے یہ بھی کہا کہ اس سیریز سے ون ڈے سیریز کے لئے بھی مدد ملے گی۔ون ڈے اور ٹی ٹونٹی سیریز کے لئے تقریباًایک ہی ٹیم ہے، نیوزی لینڈ کے خلاف سیریز سے ایشیا ء کپ اور ورلڈکپ کی تیاریوں میں مدد ملے گی۔