اسلام آباد (این این آئی)سپریم کورٹ میں حافظ قران کیلئے20اضافی نمبروں سے متعلق از خود نوٹس کیس کا تحریری حکم جاری کردیا گیا۔جسٹس اعجاز الاحسن کی سربراہی میں 6 رکنی بینچ نے کیس کا تحریری حکم جاری کیا، 6رکنی لارجر بینچ نے از خود نوٹس کیس ختم کرنے کا حکم دیا اور فیصلے میں کہا کہ میڈیکل کالجز میں داخلے کیلیے حافظ قران کو 20 اضافی نمبر دینے کا قانون ختم ہو چکا ہے۔تحریری حکم میں کہا گیا کہ 29 مارچ کو جسٹس قاضی فائز عیسی اور جسٹس امین الدین نے ان معاملات پر از خود نوٹس لیا جو چیف جسٹس کا اختیار ہے، جسٹس قاضی فائز عیسی کا دو ایک کے تناسب سے بینچز کی تشکیل،مقدمات کے تقرر سے متعلق از خود نوٹس تھا۔تحریری حکم کے متن کے مطابق 5 رکنی بینچ قرار دے چکا ہے کہ یہ اختیار صرف چیف جسٹس پاکستان کا ہے۔